Presidenti brazilian Luiz Inacio Lula da Silva ka thënë se homologu i tij rus Vladimir Putin nuk do arrestohet nëse ai merr pjesë në takimin e G-20 në Rio de Zhaneiro vitin e ardhshëm.
“Jo, ai nuk do arrestohet,” tha Lula në një intervistë me faqen indiane të lajmeve Firstpost të shtunën. “Nëse unë jam president i Brazilit, nëse ai vjen në Brazil, nuk ka asnjë mënyrë që të arrestohet”.
Gjykata Ndërkombëtare Penale lëshoi një urdhër arresti kundër Putinit në mars, duke e akuzuar atë për dëbimin e paligjshëm të qindra fëmijëve nga Ukraina. Moska e ka mohuar akuzën.
Putini humbi samitin e liderëve të G-20 në Nju Delhi, ku India ia dorëzoi Brazilit mandatin e presidencës. Ai gjithashtu humbi samitin e BRICS në Johannesburg, Afrika e Jugut muajin e kaluar.
