Administrata Biden po përgatitet në heshtje për mundësinë që nëse kundërsulmi pranveror i Ukrainës nuk i plotëson pritshmëritë, kritikët brenda dhe aleatët jashtë vendit do të argumentojnë se edhe Amerika ka dështuar.
Kundërofensiva e afërt e Ukrainës do përpiqet të rimarrë territorin e pushtuar nga Rusia, ka shumë të ngjarë në lindje dhe jug, megjithëse për arsye operacionale asnjë zyrtar i lartë nga Kievi nuk ka specifika të hollësishme.
Publikisht, ekipi i presidentit Joe Biden ka ofruar mbështetje të palëkundur për Ukrainën, duke u zotuar se do e furnizojë atë me armë dhe ndihmë ekonomike ‘për aq kohë sa duhet’. Por, nëse sezoni i afërt i luftimeve sjell përfitime të kufizuara, zyrtarët e administratës janë shprehur privatisht se kanë frikë se do përballen me një ‘përbindësh me dy koka’ që e sulmon atë nga skajet e spektrit.
Njëra palë do thotë se përparimet e Ukrainës do kishin funksionuar nëse administrata do t’i jepte Kievit gjithçka që kërkoi, domethënë raketa me rreze më të gjatë veprimi, avionë luftarakë dhe më shumë mbrojtje ajrore. Pala tjetër, shqetësohen zyrtarët e administratës, do pretendojë se mungesa e Ukrainës dëshmon se ajo nuk mund ta detyrojë Rusinë të largohet plotësisht nga territori i saj.
Kjo nuk llogarit as reagimin e aleatëve të Amerikës, kryesisht në Evropë, të cilët mund ta shohin një negociatë paqeje midis Ukrainës dhe Rusisë si një mundësi më tërheqëse nëse Kievi nuk mund të provojë se fitorja është afër.
Brenda administratës, zyrtarët theksojnë se po bëjnë gjithçka që është e mundur që ofensiva pranverore të ketë sukses.
“Ne kemi plotësuar pothuajse kërkesat që Ukraina tha se i duheshin për kundërofensivë pasi ne kemi dërguar armë dhe pajisje në Ukrainë gjatë muajve të fundit,” tha një zyrtar i administratës, të cilit, si të tjerëve, iu dha anonimiteti për të diskutuar çështje të ndjeshme.
Por besimi në kauzën strategjike është një gjë. Besimi në taktikat është një tjetër – dhe pas dyerve të mbyllura administrata është e shqetësuar për atë që Ukraina mund të arrijë.
Këto shqetësime u zbuluan kohët e fundit gjatë një rrjedhjeje informacioni të klasifikuar në mediat sociale. Një vlerësim top-sekret nga fillimi i shkurtit deklaroi se Ukraina do ishte ‘shumë larg’ nga qëllimet e saj kundërsulmuese. Vlerësimet më aktuale amerikane janë se Ukraina mund të bëjë disa përparime në jug dhe lindje, por nuk do jetë në gjendje të përsërisë suksesin e vitit të kaluar.
Ukraina ka shpresuar të shkëpusë urën tokësore të Rusisë me Krimenë dhe zyrtarët amerikanë tani janë skeptikë se kjo do ndodhë, sipas dy zyrtarëve të administratës të njohur me vlerësimin. Por ka ende shpresa në Pentagon se Ukraina do pengojë linjat e furnizimit të Rusisë atje, edhe nëse një fitore e plotë mbi trupat e sapofortifikuara të Rusisë del sumë e vështirë për t’u arritur.
Për më tepër, inteligjenca e SHBA-së tregon se Ukraina thjesht nuk ka aftësinë për të shtyrë trupat ruse nga vendi ku janë ngulitur thellë – dhe një ndjenjë e ngjashme është përhapur në fushën e betejës gjetkë në Ukrainë, sipas zyrtarëve. Presidenti ukrainas Volodymyr Zelenskyy thotë se SHBA nuk i ka armatosur siç duhet forcat e tij dhe kështu, deri atëherë, kundërofensiva nuk mund të fillojë.
Ekziston besimi se Kievi është i gatshëm të marrë në konsideratë rregullimin e objektivave të tij, sipas zyrtarëve amerikanë, dhe një synim më modest mund të jetë më i lehtë për t’u shitur si një fitore.
Ka pasur diskutime, sipas ndihmësve, për t’i përshtatur ukrainasve një si ‘armëpushim’ dhe jo si bisedime të përhershme paqeje, duke i lënë dyert e hapura Ukrainës që të rifitojë më shumë nga territori i saj në një datë të ardhshme.
Stimuj do i jepeshin Kievit: ndoshta garanci sigurie të ngjashme me NATO-n, ndihmë ekonomike nga Bashkimi Evropian, më shumë ndihmë ushtarake për të rimbushur dhe forcuar forcat e Ukrainës, dhe të tjera të ngjashme. Dhe ndihmësit kanë shprehur shpresën për riangazhimin e Kinës për ta shtyrë Putinin gjithashtu në tryezën e bisedimeve.
Por kjo do të çonte sërish në dilemën se çfarë do ndodhë më pas dhe sa ashpër do përgjigjen kritikët vendas.
“Nëse kundërsulmi nuk shkon mirë, administrata duhet të fajësojë vetëm veten për ndalimin e disa llojeve të armëve dhe ndihmave në kohën kur ishte më e nevojshme”, tha Kurt Volker, i dërguari special për Ukrainën gjatë administratës Trump.
Një kundërofensivë që nuk i përmbush pritshmëritë do bëjë që aleatët në kryeqytetet e huaja të vënë në dyshim se sa më shumë mund të kursejnë nëse fitorja e Kievit duket gjithnjë e më larg.
“Mbështetja publike evropiane mund të zbehet me kalimin e kohës pasi kostot e energjisë dhe ekonomike evropiane mbeten të larta,” tha Clementine Starling, drejtore dhe bashkëpunëtore në institutin e mendimit të Këshillit Atlantik në Uashington, D.C.
Shumë vende evropiane mund ta shtyjnë Kievin për t’i dhënë fund luftimeve.
“Një kundërofensivë e dobët do ngrejë pyetje të mëtejshme se si do duket një rezultat i luftës dhe masën në të cilën një zgjidhje mund të arrihet vërtet duke vazhduar dërgimin e armëve dhe ndihmës ushtarake”, tha Starling.
Biden dhe ndihmësit e tij të lartë kanë theksuar publikisht se Zelensky duhet të fillojë bisedimet e paqes vetëm kur të jetë gati. Por Uashingtoni i ka komunikuar gjithashtu Kievit disa realitete politike: në një moment, veçanërisht me republikanët në kontrollin e Kongresit, ritmi i ndihmës së SHBA-së ka të ngjarë të ngadalësohet. Zyrtarët në Uashington, megjithëse nuk e bëjnë presion mbi Kievin, kanë filluar të përgatiten për atë se si mund të duken ato biseda dhe e kuptojnë se mund të jetë një shitje e vështirë politike në shtëpi për Zelensky-n.
“Nëse Ukraina nuk mund të fitojë në mënyrë dramatike në fushën e betejës, në mënyrë të pashmangshme lind pyetja nëse është koha për një ndalim të negociuar të luftimeve”, tha Richard Haass, president i Këshillit për Marrëdhëniet me Jashtë.
“Është e shtrenjtë, municionet po na mbarojnë, kemi raste të tjera të paparashikuara në mbarë botën për t’u përgatitur.”
“Është legjitime të bëhen të gjitha këto pyetje pa kompromentuar qëllimet e Ukrainës. Është thjesht një çështje mjetesh,” tha Haass.
Në fillim të këtij muaji, Andriy Sybiha, një nënkryetar në zyrën e Zelenskyy, i tha Financial Times se Ukraina do ishte e gatshme të bisedonte nëse forcat e saj arrijnë në pragun e Krimesë.
“Nëse do kemi sukses në arritjen e qëllimeve tona strategjike në fushën e betejës dhe kur do jemi në kufirin administrativ me Krimenë, ne jemi gati të hapim një faqe diplomatike për të diskutuar këtë çështje”, tha ai.
Ky koment u kundërshtua shpejt nga Tamila Tasheva, e dërguara e Zelensky-t për Krimenë: “Nëse Rusia nuk do largohet vullnetarisht nga gadishulli, Ukraina do vazhdojë të çlirojë tokën e saj me mjete ushtarake”, tha ajo për Politico në fillim të këtij muaji.
Kjo nuk e ndihmon besimin e Amerikës se lufta është ngadalësuar në një zvarritje brutale.
Të dyja palët kanë shkëmbyer goditje ndëshkuese, të përqendruara në qytete të vogla si Bakhmut, pa asnjë forcë në gjendje të largojë plotësisht tjetrën. Lëvizja ruse, e urdhëruar në fillim të këtij viti, kishte për qëllim rigjallërimin e përpjekjeve luftarake të Moskës, pushtoi pak territor me koston e viktimave të konsiderueshme dhe nuk bëri shumë për të ndryshuar trajektoren e përgjithshme të konfliktit.
Luftimet kanë shkaktuar dëm edhe për ukrainasit. Katërmbëdhjetë muaj pas konfliktit, ukrainasit kanë pësuar humbje marramendëse – rreth 100,000 viktima – me shumë nga ushtarët e tyre tashmë të rraskapitur. Trupat gjithashtu kanë shpenzuar sasi historike municionesh dhe armatimi, madje edhe prodhimi i jashtëzakonshëm i Perëndimit nuk është në gjendje të përputhet me kërkesat urgjente të Zelensky-t.
Zyrtarët amerikanë e kanë informuar gjithashtu Ukrainën për rreziqet e shtrirjes së tepërt të ambicieve të saj dhe përhapjes së trupave të saj – të njëjtin paralajmërim që Biden i dha presidentit të atëhershëm afgan Ashraf Ghani ndërsa talebanët lëvizën për t’u shtrirë anembanë vendit gjatë tërheqjes ushtarake të SHBA-së në 2021.
Por mundësitë që Ukraina të tërhiqet nga aspiratat e saj më të larta janë, për të thënë të paktën, të pamundura.
“Është sikur kjo është mundësia e vetme dhe e fundit për Ukrainën që të tregojë se mund të fitojë, gjë që sigurisht nuk është e vërtetë”, tha Alina Polyakova, presidente dhe CEO e Qendrës për Analizën e Politikave Evropiane në Uashington, D.C.
VINI RE: Ky material është pronësi intelektuale e Politico
Përgatiti për Hashtag.al, K.Manjani
