Kreu i PD-së Berisha e quajti protestën e djeshme të opozitës si nisjen me dinjitoze e të merituar të revolucionit demokratik paqësor.
Gjatë një takimi me krerët e degëve të PD-së në Tiranë, ai ceku protestën e 6 dhjetorit si një mesazh për partnerët e Shqipërisë pasi opozita tha ai, nuk mund të lejonte që një samit të bëhej për kreun e një organizate kriminale.
“Kjo protestë jehoi në Shqipëri e botë më shumë se çdo protestë që kemi organizuar. Ishte nisja me dinjitoze dhe e merituar e revolucionit tonë demokratik paqësor. Nëse ne dolëm me 6 dhjetor në protestën më të pazakontë që Shqipëria kishte njohur, ne në 6 dhjetor na nxorri e vërteta në shesh. Ne kishim vetëm një mesazh, që mikpritësi juaj është turpi i vendit dhe i botës dhe se ju jeni të mirëseardhur në këtë vend. Nuk mund të pranonim kurrë që një samit të përdorej për kreun e një organizate kriminale. Por në një hark kohor të shkurtër u faktua para gjithë botës sa të drejtë kishim ne. Në dhjetor mediat e botës e dhanë lajmin e protestës sonë por mbizotëroi lajmi i atentatit që ata bënë. Megjithatë në dhjetor pati dhe nga ata që thanë se ishin tensione të brendshme politike. Koha provoi se ne dolëm për të vërtetën në rrugë, dolëm për të thënë të vërtetën liderëve evropianë, se çfarë përfaqësonte Edi Rama. Koha provoi së bëmë një nga veprimet më të goditura në ekzistencën tonë.” – tha Berisha.
Kreu i selisë blu tha se protestës iu bë jehonë e jashtëzakonshme nga mediat botërore dhe se ajo është sipari i revolucionit demokratik kundër personi që korruptoi ish-zyrtarin e FBI-së për të asgjësuar opozitën.
“Zhvillimet e mëpasme faktuan se ky njeri dhe bashkëpunëtorët e tij të ngushte nuk njohin asnjë kufi dhe asnjë normë e ligj. Nuk ndalen para asnjë veprimi për hir të pushtetit të tyre të krimit. Hapja dje e revolucionit tonë me një protest madhështore ka pushtuar mediat e botës. Protestën tonë e përcollën gjerësisht të gjitha agjencitë e mëdha të botës. ne treguam se ka një popull që nuk pajtohet me aktet kriminale të Edi Ramës. Ai rekruton kryezbuluesin e SHBA-ve për të luftuar opozitën. Protesta ishte sipari i një revolucioni paqësor e demokratik. Ata të cilët para protestës u zhdukën si minjtë nga frika e tmerri, kur e panë se u larguam të qetë dhe panë njëri-tjetrin se nuk u ndodhi gjë dolën nga ishin futur dhe filluan të thonë ku është revolucioni. Ja ku është qeveria.” – shtoi Berisha.
