Prokurori i Përgjithshëm i SHBA-së Mark Garland
Google ka përdorur praktika ‘anti-konkurruese, përjashtuese’ për të shtypur ose pakësuar në mënyrë të paligjshme çdo kërcënim të madh ndaj dominimit të saj mbi industrinë e reklamave në internet, ka pretenduar administrata e Presidentit Joe Biden në një padi kundër kompanisë.
Departamenti Amerikan i Drejtësisë (DOJ) ngriti padinë e tij antitrust kundër Google të martën në Gjykatën e Qarkut të SHBA-së në Aleksandri, Virxhinia, duke bërë thirrje që kompania të detyrohet të shesë pjesë të biznesit të saj të reklamave. Reklamimi përbën rreth 80% të të ardhurave të gjigantit të Google.
Google zotëron shërbime dominuese që u mundësojnë klientëve të ofrojnë hapësirë reklamimi, të krijojnë reklama më të mira dhe të përputhin botuesit me reklamuesit.
Kompania ka shfrytëzuar madhësinë dhe shtrirjen e saj për të blerë ose goditur konkurrentët ‘aktualë ose potencialë’ dhe për t’u lënë reklamuesve dhe faqeve në internet pak zgjedhje, përveç përdorimit të shërbimeve të saj, pretendohet në padi.
“Google ka penguar konkurrencën kuptimplotë dhe ka penguar inovacionin në industrinë e reklamave dixhitale, ka marrë për vete fitime në kurriz të konkurrencës dhe ka penguar tregun e lirë të funksionojë në mënyrë të drejtë për të mbështetur interesat e reklamuesve dhe botuesve që bëjnë të mundur internetin e sotëm të fuqishëm.” – tha Departamenti i Drejtësisë.
Google argumentoi se qeveria po përpiqej të zgjidhte fituesit dhe humbësit në biznesin ‘shumë konkurrues’ të reklamave në internet. Tetë shtete, duke përfshirë shtetin ku Google ka selinë, Kaliforninë, iu bashkuan qeverisë federale në padinë e së martës.
“Ne po marrim masa duke ngritur këtë padi për të hequr monopolin e Google dhe për të rikthyer konkurrencën në biznesin e reklamave dixhitale.” – tha Prokurori i Përgjithshëm i Kolorados, Phil Ëeiser.
Administrata e paraardhësit të Biden, presidenti i atëhershëm Donald Trump, ngriti një padi antitrust kundër Google në vitin 2020, duke pretenduar praktika antikonkurruese në biznesin dominues të kërkimit në internet të kompanisë. Kjo çështje është planifikuar të shkojë në gjyq në fund të këtij viti.
