Media greke i ka bërë jehonë vizitës së kryeministrit grek Mitsotakis në Shqipëri.
Ekathimerini shkruan se vendasit e pritën Mitsotakisin me flanmuj grekë e me thirrjet ‘Hellas, Hellas’ ndërsa kreu i Athinës zyrtare e cilësoi vizitën një moment madhështor për helenizmin.
Media greke shkruan gjithashtu se kreu i qeverisë falënderoi grekët e Shqipërisë që ‘mbajtën të pashuar flakën e helenizmit dhe ortodoksisë në vite të vështira’.
“Është një moment i veçantë për mua, por edhe një moment madhështor për helenizmin kudo. Banorët e Himarës janë një urë miqësie dhe bashkëpunimi mes Greqisë dhe Shqipërisë.” – citon Ekathimerini Mitsotakisin.
Sipas medias greke, Mitsotakis foli gjerësisht për të drejtave e grekëve shqiptarë, të cilat shkelen, dhe i lidhi ato me aspiratat evropiane të Shqipërisë.
“Unë personalisht kam qenë, jam dhe do të mbetem mbështetës i kursit europian të Shqipërisë. Detyrimi i Shqipërisë, në kuadrin e qasjes ndaj Europës, është respektimi i plotë i të drejtave tuaja, pavarësisht nëse i referohemi të drejtës për vetëvendosje, ose i referohemi të drejtës që fëmijët dhe nipërit tuaj të vazhdojnë të mësojnë gjuhën greke në të gjitha nivelet.”
Ai trajtoi gjithashtu çështjen e të drejtave pronësore të grekëve etnikë dhe mbrojtjen e tyre.
