Konflikti mes Rusisë dhe Ukrainës nuk do përfundojë së shpejti, pavarësisht kundërsulmit ‘efektiv’ të Kievit kundër trupave të Moskës, pretendon Sekretari i Përgjithshëm i NATO-s, Jens Stoltenberg.
Duke folur për BBC Radio të premten, shefi i NATO-s tha se është ‘jashtëzakonisht nxitëse të shohësh se forcat e armatosura ukrainase kanë qenë në gjendje të rimarrin territorin dhe gjithashtu të godasin prapa linjave ruse’.
Megjithatë, ai theksoi se është e rëndësishme të kuptohet se ‘ky nuk është fillimi i fundit të luftës, ne duhet të jemi të përgatitur për një afat të gjatë’.
Komentet e Stoltenberg vijnë pasi Rusia njoftoi tërheqjen e trupave të saj nga disa vendbanime në verilindje të Ukrainës, duke përfshirë qytetin e Izium. Moska thotë se hapi u ndërmor për të forcuar forcat në Donetsk, ndërsa Kievi e festoi tërheqjen ruse si një fitore.
Javën e kaluar, Stoltenberg paralajmëroi se Ukraina mund ‘të pushojë së ekzistuari’ si një komb i pavarur nëse nuk vazhdon luftën e saj kundër Rusisë, e cila, sipas tij, dëshiron të ‘marrë kontrollin e Ukrainës’.
Sekretari i Përgjithshëm përsëriti thirrjet për vendet perëndimore që të vazhdojnë mbështetjen e tyre për Kievin duke dërguar më shumë ndihmë ushtarake, si dhe duke i furnizuar me uniforma të përshtatshme për dimrin e ardhshëm, gjeneratorë dhe tenda, ndër të tjera.
