Kërkimi për 10 minatorë meksikanë të bllokuar në një gropë të përmbytur mund të zgjasë nga gjashtë deri në 11 muaj.
Kështu të paktën kanë thënë të afërmit e tyre për mediet ndërkombëtare.
“Ne nuk mund ta pranojmë këtë.”– i tha AFP-së Juani Cabriales, motra e njëritprej punëtorëve, pasi u informua nga qeveria për planin e saj.
Më 3 gusht, një mur tuneli u shemb në minierën Pinabete, që ndodhet në shtetin verior të Coahuila, duke shkaktuar përmbytje.
Nivelet e larta të ujit në boshte 60 metra të thella po vonojnë operacionin e shpëtimit. Pesë minatorë kanë arritur të shpëtojnë pas incidentit, por nuk ka pasur asnjë kontakt me 10 kolegët e tyre të bllokuar.
“Ata (qeveria) na thonë se do të duheshin 6 deri në 11 muaj për t’i nxjerrë jashtë.”- i tha zonja Cabriales agjencisë së lajmeve AFP. Erika Escobedo, gruaja e njërit prej minatorëve të bllokuar, dha të njëjtat detaje, duke thënë se të afërmit e kishin hedhur poshtë këtë plan shpëtimi të qeverisë.
“Ne jemi shumë të trishtuar… Unë jam duke menduar se si t’ua jap lajmin fëmijëve të mi.”– i tha ajo Reuters. Qeveria ende nuk ka zbuluar publikisht asnjë detaj të planit të saj të propozuar.
Operacioni i shpëtimit tashmë është penguar nga një sërë pengesash.
Rreth dy javë më parë, një dron special nënujor që mbante një kamerë u ul në një nga boshtet. Të afërmit e minatorëve kishin shpresuar se droni do t’u jepte atyre lajmet e shumëpritura për të dashurit e tyre, por droni nuk arriti në thellësinë në të cilën besohet se minatorët ishin bllokuar.
Të afërmit janë shprehur gjithashtu të zhgënjyer dhe të zemëruar për ritmin e ngadaltë të përpjekjes së shpëtimit dhe për atë që ata thanë se ishte mungesa e komunikimit. Priftërinjtë në zonë kanë thënë lutjet e tyre për shpëtimin e minatorëve.
