Duket se pas disa muajsh qetësi, rikthehen protestat në Sheshin Skënderbej në Tiranë.
Organizata Politike ka paralajmëruar organizimin e një proteste të mërkurën në orën 18:00 kundër rritjes së çmimeve të ushqimeve dhe të karburanteve.
“S’MBAN MË UJË PILAFI
Rritja e çmimeve s’ka të ndalur. Nafta ka arritur 258 lekë/litër, ndërsa vazhdojnë të rriten çmimet e ushqimeve dhe çdo produkti të domosdoshëm. Shumica dërrmuese e qytetarëve gdhihen çdo ditë e më të varfër, më të grabitur e të nëpërkëmbur.”– thuhet në njoftim.
Sipas Organizatës Politike, ndërkohë që pjesa më e madhe e shoqërisë nuk përfiton asnjë masë lehtësuese, bordet qeveritare “janë shndërruar në kartele” ku përligjet rritja skandaloze e çmimeve.
NJOFTIMI I PLOTË:
S’MBAN MË UJË PILAFI
Rritja e çmimeve s’ka të ndalur. Nafta ka arritur 258 lekë/litër, ndërsa vazhdojnë të rriten çmimet e ushqimeve dhe çdo produkti të domosdoshëm. Shumica dërrmuese e qytetarëve gdhihen çdo ditë e më të varfër, më të grabitur e të nëpërkëmbur.
Qeveria po dëshmon dita-ditës jo vetëm kapjen nga oligarkët, por edhe inkompetencë kriminale në administrimin e krizës. Oligarkët përfitojnë miliona euro subvencione, kurse më të varfrit marrin thërrime të cilave po u skadon afati.
Ndërkohë që pjesa më e madhe e shoqërisë nuk përfiton asnjë masë lehtësuese, bordet qeveritare janë shndërruar në kartele ku përligjet rritja skandaloze e çmimeve.
Në këto kushte, të durosh është luks që s’mund t’ia lejojmë vetes. Askush nuk mund t’i varë shpresat te një qeveri hajdute, e kompromentuar dhe e paaftë.
Populli duhet të marrë në dorë fatet e veta.
Të mërkurën, ora 18:00, nga Sheshi “Skënderbej” drejt Kryeministrisë.
Të gjithë në protestë!
