Festivali i Filmit në Kanë/ “Palmën e Artë” e rrëmbeu filmi i regjisorit suedez

Një satirë thumbuese sociale ka marrë çmimin kryesor në Festivalin e Kanës.

“Triangle of Sadness” ose në shqip “Trekëndëshi i trishtimit” i Ruben Ostlund, që tregon modelet dhe ultra të pasurit që u dëmtohet statusi nga ngjarje të papritura është filmi që u nderua me “Palmën e Artë” të shtunën.

Kjo është hera e dytë që regjisori suedez fiton çmimin, pasi e ka marrë atë edhe në vitin 2017 për filmin “The Square”.

Çmimin për regjisorin më të mirë e fitoi artisti i Koresë së Jugut, Park Chan-wook. Park fitoi për rolin e tij në filmin kriminal erotik “Decision to Leave” ose “Vendimi për t’u larguar”.

Çmimet u përzgjodhën nga një juri prej nëntë anëtarësh e kryesuar nga aktori francez Vincent Lindon dhe u prezantuan të shtunën në një ceremoni përmbyllëse brenda Teatrit ‘Grand Lumière’ të Kanës.

Regjisori Ostlund i filmit që fitoi “Palmën e Artë” u tha gazetarëve se kishte vendosur të bënte një film që do t’i bënte njerëzit të flisnin.

“Kur filluam të bënim këtë film, mendoj se kishim një qëllim – të përpiqeshim vërtet, me të vërtetë të bënim një film emocionues për audiencën dhe të sillnim përmbajtje që provokon mendime.”- tha Ostlund sipas BBC, duke shtuar: “Ne donim t’i argëtonim ata, ne donim që ata t’i bënin pyetje vetes, ne donim që pas shfaqjes të dilnin dhe të kishin diçka për të folur.”

Filmi i tij sigurisht që ka marrë një reagim nga audienca, me agjencinë e lajmeve AFP që vuri në dukje se një skenë në veçanti ishte “duke i bërë shikuesit ose të ulërinin nga të qeshurat ose të villnin” gjatë premierës së tij.