Presidenti amerikan Joe Biden ka paralajmëruar se SHBA është gati të ndërhyjë ushtarakisht për të mbrojtur Tajvanin nëse sulmohet nga Kina.
Biden bëri një krahasim midis pushtimit të Ukrainës nga Rusia dhe Tajvanin, duke shkaktuar një reagime të forta në Pekin.
Ai është në turneun e tij të parë në Azi si president i SHBA-së.
Biden i parapriu komentet e tij duke thënë se politika e SHBA-së ndaj Tajvanit “nuk ka ndryshuar“. Por komentet e tij në Tokio janë hera e dytë në muajt e fundit që ai ka deklaruar pa mëdyshje se SHBA do të mbronte Tajvanin nëse Kina sulmonte. SHBA më parë ka qenë e paqartë se çfarë do të bënte në një situatë të tillë.
Kina e konsideron Tajvanin si një provincë të shkëputur që duhet të ribashkohet me kontinentin.
Zëdhënësi i ministrisë së jashtme të Pekinit, Wang Wenbin, këmbënguli: “Tajvani është një pjesë e patjetërsueshme e territorit të Kinës… nuk ka vend për kompromis apo lëshime.”
“Çështja e Tajvanit dhe çështja e Ukrainës janë thelbësisht të ndryshme. Krahasimi i këtyre të dyjave është absurd. Ne i bëjmë thirrje edhe një herë SHBA-së që t’i përmbahet parimit ‘Një Kinë’.”– shtoi ai, citon BBC.
Çfarë tha Biden?
Presidenti Biden po u përgjigjej pyetjeve në Tokio gjatë një konference për shtyp me kryeministrin japonez Fumio Kishida, kur një gazetar i pyeti ata për mbrojtjen e Tajvanit.
Presidenti amerikan filloi duke e lidhur drejtpërdrejt situatën Kinë-Tajvan me pushtimin rus të Ukrainës.
“Ata tashmë po flirtojnë me rrezikun duke fluturuar kaq afër dhe me të gjitha manovrat që po ndërmarrin.”- tha Biden, duke iu referuar raporteve në rritje të inkursioneve të avionëve luftarakë kinezë në zonën e vetëshpallur të mbrojtjes ajrore të Tajvanit.
Ai shtoi se ndërsa “prishmëria ime është që kjo (një pushtim kinez) nuk do të ndodhë, as nuk do të tentohet”, në të njëjtën kohë varet nga “sa e fortë bota e bën të qartë se ai lloj veprimi do të rezultojë në mosmiratim afatgjatë”.
Më pas ai u pyet drejtpërdrejt nëse SHBA-ja do ta mbronte Tajvanin ushtarakisht nëse Kina do të pushtonte, ndërkohë që nuk e ka bërë këtë në pushtimin e Ukrainës, dhe ai u përgjigj: “Po… ky është angazhimi që kemi marrë.”
