Komisioni i Rithemelimit ka reaguar pas mbledhjes të grupit parlamentar të thirrur sot nga Enkelejd Alibeaj si dhe pas publikimit të draftit me kriteret e presidentit.
Në një dalje për mediat nga selia blu, drejtoresha e Komunikimit për mediat në Komisionin e Rithemelimit, Floriana Garo tha se ky dokument fakton marrëveshjen Rama – Basha- Alibeaj. Au u bëri thirrje deputetëve demokratë që të distancohen nga ajo që e quan lojë e ulët e kësaj tresheje në kurriz të PD-së dhe pluralizmit politik në Shqipëri.
“Dje deputeti Alibeaj ka njoftuar në kundërshtim të plotë me vendimet e Kuvendit të PD-së të datës 30.04.2022 dhe rregulloren e grupit parlamentar të PD-së, mbledhje grupi parlamentar për ditën e sotme si dhe ka shpërndarë pa asnjë tagër një dokument që përfaqëson de fakto marrëveshjen Rama-Basha, për propozimin e kandidatit të Edi Ramës nga opozita e emëruar Basha-Alibeaj.
Kështu Edi Rama me ndihmën e dyshes së emëruar prej tij Basha-Alibeaj zgjedh presidentin e tij të propozuar nga pseudoopozita dhe mendon se mbyll në mënyrën më të turpshëm dhunimin masiv të zgjedhjeve të 25 Prillit 2021.
Në këtë kontekst, marrëveshja Rama – Basha – Alibeaj është një akt tradhtie ndaj 620 mijë zgjedhësve që votuan më 25 prill për PD dhe opozitën shqiptare.
Ky Dokument është një akt keqpërdorimi dhe keqshfrytezimi si fasadë, por edhe poshtërimi nga Edi Rama të Bashaalibeit dhe ndonjë ndjekësi të tyre, me farsën e zgjedhjes së Presidentit të Republikës.
Në këtë marrëveshje del qartë se kriteret janë ato që ka shpallur Rama, por tani, nëpërmjet binomit Basha-Alibeaj, i paraqet ato si të opozitës.
Për të maskuar këtë fakt skandaloz, është vendosur si gjethe fiku, një kriter qesharak sipas të cilit kandidati për president të mos ketë patur 5 vitet e fundit asnjë funksion në shtet.
Me këtë propozim, Basha-Alibeaj duan të na bindin se me kritere, ata po përjashtojnë kandidatura që kanë lidhje me Edi Ramën paçka se ky i fundit, ka jo 5 por 9 vite në pushtet dhe siç dihet, kontrollon të gjitha OJQ-të përfshirë këtu edhe atë të Alibeajt.
Ky dokument vjen në kundërshtim flagrant me rezolutën e Këshillit Kombëtar të datës 6 maj 2022 për zgjedhjen e Presidentit të Republikës.
Ai bie gjithashtu në kundërshtim të hapur me praktikat transparente të deri-sotme në zgjedhjen e Presidentit të Republikës.
PD dënon marrëveshjen Rama-Basha-Alibeaj si një akt kundër pluralizmit politik në Shqiperi, një lojë e neveritshme me demokratet dhe popullin opozitar, i cili i nënshtron këta të fundit për llogari të pazareve me Edi Ramën.
Partia Demokratike u bën thirrje deputetëve të saj të distancohen nga loja e ulët Rama-Basha-Alibeaj në kurriz të PD, popullit opozitar, demokracisë, dhe pluralizmit politik në Shqipëri.”- tha Garo.
