Ambasadorët e BE-së deri më tani nuk kanë arritur një marrëveshje për një paketë të re sanksionesh kundër Rusisë, pasi Hungaria vazhdon të kundërshtojë propozimin për ndalimin e importeve të naftës ruse. Kështu ka raportuar Bloomberg.
BE-ja ka dalë tashmë me pesë raunde sanksionesh, të cilat po vendosen në përgjigje të ofensivës së vazhdueshme ushtarake të Moskës në Ukrainë.
Në fillim të kësaj jave, kryetarja e Komisionit Evropian Ursula von der Leyden konfirmoi se propozimet për paketën e gjashtë të sanksioneve përfshijnë një embargo totale të zbatuar gradualisht ndaj naftës ruse. Kjo është padyshim masa më e ashpër deri më tani për vetë BE-në, duke pasur parasysh se në vitin 2021, blloku në tërësi mori 25% të importeve të naftës nga Rusia, sipas të dhënave të Eurostat.
Duke pranuar kundërshtimet e Hungarisë dhe Sllovakisë, të cilat mbështeten shumë në importet ruse, BE thuhet se u ka ofruar këtyre dy vendeve, si dhe Republikës Çeke, të shtyjnë zbatimin e këtyre sanksioneve deri në vitin 2024. Vendet e tjera supozohet të kalojnë më herët në furnizime alternative.
Megjithatë sipas Bloomberg, kjo “ofertë” nuk ka mjaftuar për të bindur Hungarinë, e cila vazhdoi të bllokojë marrëveshjen të dielën, gjatë takimit të 27 ambasadorëve të BE-së. Dy ditë para kësaj, kryeministri hungarez Victor Orban tha se ndalimi i naftës do të ishte një “bombë bërthamore” për ekonominë e vendit të tij dhe zbuloi se ai dëshiron që BE t’i japë Hungarisë të paktën pesë vjet për të zëvendësuar naftën ruse.
Megjithatë, ndalimi i naftës me sa duket nuk është e vetmja pjesë problematike e paketës së sanksioneve. Ndalimi i propozuar për ofrimin e anijeve dhe shërbimeve të nevojshme për të transferuar naftën ruse në vendet e treta ka hasur kundërshtime në Greqi dhe Qipro, sipas Bloomberg.
Masat e tjera të propozuara përfshijnë shkurtimin e më shumë bankave ruse nga sistemet e pagesave SËIFT dhe ndalimin e subjekteve dhe individëve rusë për të blerë prona në BE.
Çdo masë duhet të miratohet unanimisht nga 27 vendet anëtare të bllokut.
