Ish-anëtari i Këshillit Kombëtar të PD-së Edvin Kulluri nëpërmjet një postimi në rrjetet sociale është tërhequr nga iniciativa për kandidimin për kreun e Partisë Demokratike.
Kulluri e cilëson Komisionin zgjedhor si anti-statutor dhe afatin për “primare” prej dy javësh me kohën e njëjtë të lënë nga Lulzim Basha në zgjedhjet e qershorit të kaluar.
Kulluri ka bërë ironi me procesin duke thënë se po kalohet nga “Lul Brava te Doktor Dryni”.
Postimi i plotë:
“Të dashur miq! Dje u njoha me vendimin e një Komisioni Zgjedhor të vetë emëruar pa vendim të Këshillit Kombëtar si organ i zgjedhur, që shpalli procedurat për zgjedhjet për Kryetar të PDSH!
Meqenëse para disa muajsh shpalla vullnetin për të kandiduar për Kryetar të PDSH, konstatoj se: 1) Komisioni Zgjedhor është anti-statutor; 2) afati për “primare” prej 2 javësh është i njëjti me afatin e vendosur nga Lul Brava qershorin e kaluar, duke mos u lënë kohë kandidateve për të bërë fushatë; 3) në këtë Komision ka anëtarë të njëjtë nga ata që vodhën vota për Lul Braven duke e bërë këtë proces po aq të pabesueshëm; 4) nuk ka sërish asnjë transparence për listat e anëtarësi së PDSH; 5) kandidatët nuk janë pyetur për përbërjen e Komisionit, sipas parimit të shokut Stalin “populli voton, votat i numërojmë ne”; 6) zgjedhjet po mbahen ndërkohe që PD është e përçarë me keq se 1 vit me parë!
E vetmja gjë që ndryshon nga zgjedhjet e vjedhura në 13 qershor me këto të 22 majit është se po kalojmë nga “Lul Brava” tek “Doktor Dryni”!
Fatkeqësisht PD dhe demokratët po tallen dhe nëpërkëmben po njësoj prej të paktën 5 vitesh duke i privuar nga debati i lire, vota e lire dhe përfaqësimi!
Propaganda e 11 dhjetorit për “primare” e “sovranitet” vote rezultoi veçse propagandë duke zhgënjyer për të disatën herë demokratet e ndershëm dhe opinionin publik!
Për këto arsye, vendosa të mos bëhem pjesë e kësaj farse të shëmtuar zgjedhore duke u terhequr nga kandidimi per Kryetar te PDSH me keqardhjen e dikujt qe lufton prej 5 vitesh për demokratizim real te PDSH dhe jo uzurpim të karriges së Kryetarit dhe strukturave lokale dhe qendrore!
Me shpresën se Grupi Parlamentar i PDSH si i vetmi organ legjitim do të bëjë përpjekjet maksimale për të nxjerrë partine nga kriza më e rëndë në 32 vite histori, mbetëm me shpresën se ka ende një të ardhme për opozitën!
I uroj Komisionit Zgjedhor dhe Kryetarit të vetë-emëruar “suksese në jetë” dhe demokrateve durim dhe besim tek rivendosja e demokracisë në Partinë Demokratike!
Me respekt, Edvin Kulluri!”
