Partitë Popullore Evropiane (EPP), grupimi më i madh politik në Parlamentin Evropian, bëri thirrje për një rishikim të praktikave bankare të Zvicrës dhe që vendi të përfshihet në listën e zezë të parave të pista të BE-së, pasi dokumentet e zbuluara të Credit Suisse zbuluan se banka ka marrëdhënie me klientë të dyshimtë.
Gjiganti bankar zviceran thuhet se i ka shërbyer një listë të klientëve të ndryshëm për dekada, ku përfshiheshin krerët e shteteve dhe shefat e spiunazhit, si dhe abuzues të të drejtave të njeriut dhe individë të sanksionuar.
“Gjetjet e ‘Sekreteve Zvicerane’ tregojnë për mangësi masive të bankave zvicerane kur bëhet fjalë për parandalimin e pastrimit të parave,” tha koordinatori i EPP për çështjet ekonomike Markus Ferber, duke shtuar: “Kur bankat zvicerane dështojnë të aplikojnë standardet e duhura kundër pastrimit ndërkombëtar të parave, vetë Zvicra bëhet një juridiksion me rrezik të lartë.”
EPP publikoi propozimin pas raportimeve të medias të hënën mbi rezultatet e hetimeve mbi rrjedhjen e të dhënave për mijëra llogari të mbajtura në bankë gjatë dekadave të fundit.
Hetimi, i quajtur ‘Suisse Secrets’, identifikoi klientët e bankës zvicerane të cilët ishin përfshirë në tortura, trafik droge, pastrim parash, korrupsion dhe krime të tjera të rënda.
Nëse Zvicra i shtohet listës së zezë, ajo do të përballet me kujdesin e shtuar të zbatuar për transaksionet e lidhura me kombet, duke përfshirë Iranin, Mianmarin, Sirinë dhe Korenë e Veriut. Lista e zezë e BE-së për pastrimin e parave aktualisht përfshin 21 vende, asnjë prej të cilëve nuk është evropiane.
Përgatiti për Hashtag.al, Klodian Manjani
