Presidenti ukrainas Volodymyr Zelensky ka dënuar vendimin e Rusisë për të njohur dy republika separatiste në rajonin lindor të Donbasit, duke e quajtur këtë veprim një shkelje të sovranitetit të vendit të tij.
Duke folur gjatë një fjalimi televiziv të martën në mëngjes, Zelensky akuzoi Moskën për minimin e përpjekjeve diplomatike për të zgjidhur luftimet me separatistët në Donbass, duke thënë se vendimi i presidentit Putin për të njohur republikat Donetsk dhe Lugansk shkeli marrëveshjet e negociuara në Minsk.
“Ukraina pa mëdyshje i cilëson veprimet e fundit të Federatës Ruse si shkelje të sovranitetit dhe integritetit territorial të shtetit tonë”, tha ai. “E gjithë përgjegjësia për pasojat e këtyre vendimeve i takon lidershipit politik të Rusisë.”
Të hënën vonë, presidenti rus tha se qeveria e tij do t’i njohë ‘menjëherë’ dy republikat, të krijuara pas grushtit të shtetit në EuroMaidan të Ukrainës në vitin 2014 – dhe urdhëroi ushtrinë ruse të hyjë në republikat e njohura rishtazi si një forcë paqeruajtëse.
“Ne mund të dallojmë qartë provokimet dhe ofensivën e trupave të agresorit. E vërteta është në anën tonë. Dhe ne kurrë nuk do ta fshehim të vërtetën nga ju.” – tha më tej Zelensky.
Vendimi i Putinit për të njohur republikat vjen pasi forcat besnike ndaj republikave separatiste dhe ushtria e Kievit akuzuan njëra-tjetrën për bombardime të rënda nëpër linjat e kontaktit.
Veprimi i Rusisë në Donbass u dënua më herët nga Shtetet e Bashkuara, nga Sekretari i Përgjithshëm i OKB-së, aleanca ushtarake e NATO-s dhe Bashkimi Evropian, i cili u zotua menjëherë të vendosë sanksione.
