Kompania Pfizer/BioNTech i ka kërkuar rregullatorëve të shëndetësisë në SHBA që të autorizojnë përdorimin e vaksinës së tyre Covid-19 tek fëmijët nga gjashtë muaj e sipër, grupmosha e fundit që ende nuk është vaksinuar.
Aplikimi, të cilin kompania tha se e ka dorëzuar në Administratën e Ushqimit dhe Barnave të martën, mund të çojë në vaksinimin e fëmijëve 6 muaj deri në 5 vjeç që në mars.
Aplikimi i kompanisë kërkon nga FDA të lejojë vaksinimin me dy doza edhe pse ai dha rezultate zhgënjyese në disa fëmijë gjatë testimit.
Tek fëmijët e moshës 2 deri në 5 vjeç, vaksinimet nuk u zbuluan se ofrojnë ndonjë përgjigje imune. Arsyet për këto gjetje janë të paqarta.
Fëmijët mund të kenë nevojë të marrin një përforcues për t’u mbrojtur plotësisht, ashtu si adoleshentët dhe të rriturit. Ky testim po vazhdon dhe Pfizer pret rezultate gjatë gjysmës së parë të këtij viti.
Pfizer tha se synon që fëmijët të marrin tre doza.
“Përfundimisht, ne besojmë se tre doza të vaksinës do të nevojiten për fëmijët nga 6 muaj deri në 4 vjeç për të arritur nivele të larta mbrojtjeje kundër varianteve aktuale dhe të mundshme të ardhshme”, tha shefi ekzekutiv i Pfizer, Albert Bourla.
FDA nxiti kompaninë Pfizer që të paraqesë aplikimin për dy injeksionet e para tani, në mënyrë që fëmijët e vegjël të kenë të drejtë për një dozë përforcuese.
Pfizer dhe qeveria kanë thënë se SHBA duhet të ketë furnizime të mjaftueshme për fëmijët më të vegjël, të cilët mund të vaksinohen në zyrat e mjekëve, shkolla dhe vendet e tjera të vaksinimit.
Nëse FDA i autorizon injeksionet, fëmijët e vegjël fillimisht do të merrnin dy doza me një distancë prej tre javësh, ashtu si adoleshentët dhe të rriturit. Por fëmijët do të merrnin një dozë më të ulët prej 3 mikrogramësh, një e dhjeta e asaj që marrin njerëzit 12 vjeç e lart.
Përgatiti për Hashtag.al, Klodian Manjani
