Shtatë persona u arrestuan në kryeqytetin e Austrisë, Vjenë, pasi kundërshtarët e kufizimeve të rrepta Covid-19 thyen barrierat e policisë dhe u përleshën me oficerët. Vendi ka njoftuar se do e bëjë të detyrueshëm vaksinimin në shkurt.
Deri në 2,000 persona u mblodhën në një demonstratë në Vjenë të shtunën. Ata brohorisnin ‘Liri’ ndërsa marshonin, me disa tabela që mbanin ku lexohej: ‘Njerëzit po mbyllin njerëzit, jo virusi’.
Një numër protestuesish kapërcyen barrikadat e policisë duke marrë rrugë të tërthorta, ndërsa disa grupe i depërtuan ato. Oficerët u filmuan duke përdorur barriera metalike për të larguar njerëzit nga rrugët. Në një moment, policia shpërndau një grumbullim prej 150 deri në 200 protestuesish, duke konfiskuar flamuj, daulle dhe altoparlantë.
Shtatë persona u arrestuan, njoftuan mediat austriake, duke cituar policinë. Më shumë se 100 akuza shtesë janë ngritur për shkelje të ligjit për tubime publike. Një oficer ka mbetur i plagosur lehtë.
Mitingje të ngjashme u mbajtën në Klagenfurt, Innsbruck dhe Leibnitz. Austria lehtësoi bllokimin e saj më të fundit javën e kaluar, por vetëm për qytetarët e vaksinuar. Vaksinimi i detyrueshëm në mbarë vendin pritet të hyjë në fuqi duke filluar nga 1 shkurti 2022.
