Sekretari i Përgjithshëm i PD-së Bardhi ka reaguar menjëherë pas publikimit të një lajmi se ai kishte pëlqyer një foto të Aleks Sorosit, djalit të miliardarit hungarezo-amerikan, Xhorxh Soros.
Ai e quan të gjithë një shpifje dhe fotomontazh të denjë për Sigurimin e Shtetit foton e publikuar nga portali Syri.net pak më herët.
Sipas tij, ky është një lajm i sajuar nga media në fjalë për ta goditur atë personalisht vetëm se nuk i qan dot hallin personal që ka zënë drejtuesin e portalit. Ai ka njoftuar se do ngrejë padi penale për shpifje e padi civile për fyerje ndaj Syri.net.
Më herët portali publikoi dy lajme të njëpasnjëshme. Fillimisht duke postuar një foto ku pretendonte se Bardhi kishte pëlqyer një foto në Instagram të Aleks Soros e më pas një lajm, që Bardhi e kishte fshirë pëlqimin e tij.
Reagimi i Bardhit
“Kur vendosa të përfshihem në politikë, e bëra me besimin se përfaqësoj shumë të rinj të ndershëm, me integritet, të përkushtuar dhe profesionistë, që duan të bëjnë diçka të mirë për vendin. Nuk jam penduar për asnjë moment, megjithëse këtë vit, më shumë se kurrë më parë jam ndeshur me situata dhe sulme politike, kryesisht shpifje për të denigruar figurën time. Në të shumtën e herëve më vjen të qesh, por ka edhe raste që revoltohem me padrejtësinë, ligësinë dhe intensitetin e lartë të injorancës e vulgaritetit që përmbajnë sulmet.
Një nga keta raste është edhe shpifja e sotme, në adresën time nga Syri.net. Është për të ardhur keq sesi halli personal i drejtuesve të portalit e ka degraduar atë kaq shpejt. Pas gati 3 muaj sulmesh personale, sot kanë arritur nivelin më të ulët njerëzor, duke sajuar një fotomontazh, të denjë për Sigurimin e Shtetit. Një meme mercenare, e publikuar në rrjetet sociale, Syri.net e ka sajuar si lajm për të më goditur mua për faktin e vetëm se nuk i qaj dot hallin e madh personal që ka zënë drejtuesit e portalit.
Kur hyra në politikë, vendosa të mos jap asnjë rëndësi lajmeve të rreme në lidhje me mua, por ky rast më ka bërë të reflektoj. Nuk do të lejoj që për shkak të pozicionit tim politik, të cënohet morali im, dinjiteti im njerëzor dhe aq më pak familja ime! Nuk do të lejoj kurrë askënd, që me mekanizma mafiozë, si ky i sotmi, të më shfokusojë në ushtrimin e përgjegjësive përpara demokratëve. Për këtë arsye, kam vendosur të depozitoj padi penale për shpifje dhe padi civile për fyerje ndaj portalit Syri.net.
Kushdo në Syri.net apo aleatë të tij të dukshëm e të padukshëm, që mendojnë se me sajesa, fotmontazhe, me fyerje dhe sharje do të më intimidojë, gabohet rëndë! Hallet dhe problemet personale do të duhet t’i mbani në shtëpinë tuaj, jo në shtëpinë e demokratëve!”
*Syri.net publikoi sot këtë imazh, ku sipas tyre Bardhi ka pëlqyer një postim të Alex Sorosit
