Katër punonjës të Inspektoriatit Vendor të Mbrojtjes së Territorit në Bashkinë Patos janë proceduar penalisht për shpërdorim detyre.
Bëhet fjalë për kryeinspektorin e Inspektoriatit Vendor të Mbrojtjes së Territorit në Bashkinë Patos, së bashku me dy inspektorë në këtë institucion dhe me specialisten për mbrojtjen e tokës në Njësinë Administrative të Zharzës janë proceduar penalisht.
Procedimi i tyre lidhet me një incident të ndodhur ditën e djeshme në kodrat e fshatit Zharrëz, ku u arrestua një person për gërmim të paligjshëm, me qëllim realizimin e një ndërtimi pa leje.
NJOFTIMI I POLICISË
Në vijim të informacionit të dhënë ditën e djeshme mbi arrestimin në flagrancë të shtetasit S. T. i cili u kap nga shërbimet e Policisë, duke gërmuar dhe shpërdoruar tokën për të ndërtuar në mënyrë të paligjshme, gjë që ka sjellë prishjen e strukturës së tokës, specialistët për Hetimin e Krimit Ekonomik e Financiar në DVP Fier, proceduan penalisht për veprën penale “Shpërdorim detyre”, shtetasit:
- G., 31 vjeç, banues në Patos, me detyrë Kryeinspektor pranë Inspektoriatit Vendor të Mbrojtjes së Territorit në Bashkinë Patos.
- Xh. C., 27 vjeç, banues në Patos, me detyrë Inspektor pranë Inspektoriatit Vendor të Mbrojtjes së Territorit në Bashkinë Patos.
- L., 63 vjeç, banues në Patos, me detyrë Inspektor Kontrolli i Territorit në IVMT në Bashkinë Patos.
- P., 58 vjeçe, banuese në Patos, me detyrë Specialiste për Administrimin dhe Mbrojtjen e Tokës në Njesinë Administrative Zharrëz.
Këta shtetas nuk kanë kryer detyrën funksionale mbi parandalimin dhe marrjen e masave të veprimtarisë së paligjshme të ndryshimit të regjimit juridik të tokës nga ana e shtetasit S. T. Materialet i kaluan Prokurorisë për veprime të mëtejshme.”
