Vrimat e ‘Pusit të Ferrit’ në Jemen janë eksploruar nga një grup shkencëtarësh. Ata janë futur në gropën e thellë duke marrë mostra uji, shkëmbinj, tokë dhe disa kafshë të ngordhura. Shkencëtarët nga Omani kanë arritur të zbresin me sukses në gropën e njohur si ‘Pusi i Barhout’ i vendosur në provincën Al-Mahra të Jemenit.
Vrima 30 metra e gjerë, nganjëherë e quajtur ‘Pusi i Ferrit’, arrin një thellësi prej afërsisht 112 metrash dhe sipas disa tregimeve, lëshon aroma të çuditshme, raporton AFP, duke shtuar se disa vendas besojnë se vrima e gropës është një burg për xhinët.
Ekipi i Eksplorimit të Shpellave të Omanit, megjithatë, nuk zbuloi asgjë të mbinatyrshme gjatë zbritjes, po vetëm gjarpërinj, kafshë të ngordhura dhe perla shpellash.
“Kishte gjarpërinj, por ata nuk do t’ju shqetësojnë nëse nuk i shqetësoni ata,” i tha medias Mohammed al-Kindi, një profesor gjeologjie në Universitetin Gjerman të Teknologjisë në Oman dhe një nga tetë shkencëtarët që u përfshinë në gropë. Ai gjithashtu përmendi se ekipi ‘mblodhi mostra uji, shkëmbinj, tokë dhe disa kafshë të ngordhura’, megjithëse këto mostra ende nuk janë analizuar.
“Kishte zogj të ngordhur, gjë që krijon erë të keqe, por nuk kishte erë të pakëndshme,” shtoi ai.
Zyrtarët jemenas thanë në qershor se ata nuk kishin arritur kurrë në fund të gropës dhe se ata nuk kishin asnjë ide se çfarë ishte atje poshtë, duke vlerësuar se mosha e gropës ishte ‘miliona’ vjet e vjetër.
