Policia në Dibër ka vënë në pranga një 29-vjeçar, i cili ishte i shpallur në kërkim për vjedhje.
Besmir Maha dyshohet si autori 7 vjedhjeve dhe gjykata ka vendosur masën e sigurisë “arrest me burg”.
“Specialistët për Hetimin e Krimit në Komisariatin e Policisë Dibër, në kuadër të operacionit policor të koduar ‘Vakuf’, në një banesë të braktisur në fshatin Vakuf, kanë kapur dhe ndaluar shtetasin e shpallur në kërkim policor:
– Besmir Maha, 29 vjeç, banues në Peshkopi.
Për këtë shtetas, Gjykata e Rrethit Gjyqësor Dibër ka caktuar masën e sigurisë ‘arrest në burg’, për veprat penale ‘Vjedhja’ dhe ‘Vjedhja e mbetur në tentativë’, pasi nga veprimet hetimore të kryera ka rezultuar se është autor i dyshuar i 7 rasteve të vjedhjeve në banesa dhe në lokale, të ndodhura më parë në qytetin e Peshkopisë dhe zonat përreth saj.
Në momentin e ndërhyrjes, në tavanin e banesës së braktisur ku ishte i fshehur shtetasi B. M., Policia gjeti dhe sekuestroi një armë gjahu që e mbante pa leje, një armë të ftohtë thikë dhe municion luftarak.
Materialet hetimore iu referuan Prokurorisë Dibër, për hetime të mëtejshme.”– njofton policia.
