Organizata Botërore e Shëndetësisë (OBSH) ka kritikuar BE-në për kontrollet e eksportit të vaksinave të prodhuara brenda bllokut që ka njoftuar se do bëjë, duke thënë se masa të tilla rrezikojnë zgjatjen e pandemisë.
BE-ja e prezantoi këtë masë mes një grindjeje me kompanitë prodhuese të vaksinave mbi vonesat e furnizimeve, shkruan BBC.
Por nënkryetarja e OBSH-së Mariangela Simao, tha se ky reagim i BE-së ishte një “trend shumë shqetësues”.
Më herët shefi i OBSH-së Dr Tedros Adhanom Ghebreyesus tha se “nacionalizmi i vaksinave” mund të çojë në një zgjatje të periudhës së shërimit të të infektuarve.
Ai tha se grumbullimi i vaksinave do të “mbajë pandeminë të ndezur dhe … ngadalësojë rigjenerimin e ekonomisë globale” përveç se është një “dështim moral katastrofik” që mund të zgjerojë më tej pabarazinë globale.
Çfarë po bën BE-ja?
Bashkimi Evropian po fut kontrollet e eksportit lidhur me vaksinat e koronavirusit të prodhuara në bllok.
I ashtuquajturi mekanizëm i transparencës u jep vendeve të BE-së kompetenca për të mohuar autorizimin për eksportet e vaksinave, nëse kompania që i bën ato nuk ka respektuar kontratat ekzistuese me BE-në.
“Mbrojtja dhe siguria e qytetarëve tanë është një përparësi dhe sfidat me të cilat përballemi tani nuk na linin zgjidhje tjetër veçse të vepronim.”– tha Komisioni Evropian i cili vendosi t’i merrte këto masa pasi kompanitë filluan të shkaktojnë vonesa në furnizimin me dozat e vaksinave.
Kontrollet do të prekin rreth 100 vende të botës – përfshirë Mbretërinë e Bashkuar, SHBA-në, Kanadanë dhe Australinë.
