Portugalia është bërë shteti i fundit evropian që njofton kufizime të reja lidhur me pandeminë Covid-19, ndërsa Austria dhe Anglia gjithashtu përgatiten për bllokim, mes reagimit publik në shtetet e tjera që kanë vendosur rikthimin në karantinë nga vala e dytë e Covid-19. Më herët vendime të ngjashme kanë marrë Franca, Gjermania, Italia e Spanja.
Në Portugali, njerëzit u urdhëruan të qëndronin në shtëpi përveç punës thelbësore, shkollës ose pazareve thelbësore, ndërsa kompanitë do të kalojnë në punë online kudo që të jetë e mundur.
Masat e reja të bllokimit do të hyjnë në fuqi më 4 nëntor dhe do të prekin menjëherë gati 70 përqind të popullsisë në 121 bashki. Kryeministri Antonio Costa, megjithatë, paralajmëroi se edhe më shumë zona mund të shtohen në listë nëse shkalla e infeksioneve të koronavirusit vazhdon të rritet.
Në Angli, nga 5 nëntori deri të paktën më 2 dhjetor, njerëzit do të lejohen të dalin nga banesa vetëm për arsye specifike, duke përfshirë arsimimin, punën, ushtrimet fizike, pazaret për gjërat e domosdoshme ose kujdesin për personat në nevojë.
Pubet dhe restorantet do të mbyllen dhe do të lejohen të shesin vetëm për ata që duan të marrin gjëra me vete. E gjithë tregtia jo-thelbësore gjithashtu do të ndalet. Sidoqoftë, dyqanet, shkollat dhe universitetet thelbësore do të mbeten të hapura.
Në Austri, një bllokim masiv fillon në 3 Nëntor, me një shtetrrethim në vend nga 8 e mbrëmjes deri në 6 të mëngjesit çdo natë deri në dhjetor.
Të gjithë restorantet, baret dhe kafenetë do të jenë të mbyllura përveç shërbimeve të dorëzimit. Teatrot, muzetë dhe palestrat, si dhe kopshtet dhe shkollat fillore, do të mbyllen gjithashtu, ndërsa shkollat e mesme dhe universitetet do të kalojnë në mësimin në distancë.
