WhatsApp ka filluar shërbimin e tij të pagesave digjitale në Brazil pasi aplikacioni i mesazheve përfiton nga popullariteti i tij në tregjet në zhvillim. Masa vjen pasi kompania mëmë Facebook po ecën përpara me planet për të sjellë më shumë tregti elektronike në platformat e saj.
WhatsApp Pay lejon përdoruesit të dërgojnë para tek njëri-tjetri falas ose të bëjnë blerje nga bizneset e vogla. Në janar, kryeshefi ekzekutiv Mark Zuckerberg përshkroi planet për të ofruar shërbimin në Indi, Indonezi dhe Meksikë.
Në blogun e tij, WhatsApp theksoi se zhvillimi ishte pjesë e një strategjie më të gjerë të pagesave dixhitale në të gjitha platformat e Facebook.
“Për shkak se pagesa në WhatsApp mundësohet nga Facebook Pay, në të ardhmen duam të bëjmë të mundur që njerëzit dhe bizneset të përdorin të njëjtën kartë informacioni në familjen e aplikacioneve të Facebook.”
Ndërsa pagesa nga personi në person do të jetë falas bizneset e vogla do të duhet të paguajnë një “tarifë përpunimi për të marrë pagesa të klientit”, thuhet në blog, raporton Scan-Tv.
WhatsApp ka 120 milion përdorues në Brazil, duke e bërë vendin tregun e dytë më të madh pas Indisë. Kompania tashmë ka qenë duke paralajmëruar shërbimin e pagesave në Indi, ku ka 400 milion përdorues. Sidoqoftë, përpjekjet e firmës për të filluar WhatsApp Pay në Indi janë mbajtur për dy vjet nga rregullatorët.
