Dy policë në Buffalo, në New York, janë pezulluar nga puna për shkak të një videoje që është bërë virale në rrjet, ku shihen duke shtyrë përtokë një burrë 75-vjeçar, i cili përplas kokën në trotuar dhe mbetet ashtu i gjakosur përtokë.
Pamjet tregojnë se ndërsa burri i thinjur po mundohej të fliste me oficerët gjatë protestës, njëri nga ata e shtyn me shkop e tjetri me dorë.
I moshuari rrëzohet dhe përplas kokën në trotuar. Dëgjohet një zhurmë dhe më pas shihet që atij po i del gjak. Dikush dëgjohet më pas duke kërkuar një mjek, por oficerët vazhdojnë rrugën duke e lënë të moshuarin të shtrirë përtokë.
Kryetari i Buffalo-s, Byron Brown, tha se burri i paidentifikuar është dërguar në spital ku ndodhet në gjendje të rëndë. Të dy policët tani janë nën hetim.
Incidenti ka nxitur mjaft kritika në rrjetet sociale lidhur me brutalitetin e policisë, në protestat e zhvilluara pikërisht kundër dhunës së policëve dhe diskriminimit pas vdekjes së afo-amerikanit George Floyd.
