Kina ka urdhëruar tre gazetarë të huaj të Wall Street Journal të largohen nga vendi për shkak të një shkrimi, i cili është konsideruar “racist“.
Artikulli i botuar në 3 shkurt kritikoi mënyrën se si ka reaguar vendi ndaj shpërthimit të koronavirusit vdekjeprurës.
BBC shkruan se Ministria e jashtme kineze tha se i kishte kërkuar gazetës të kërkonte falje disa herë, por ajo kishte refuzuar.
Sipas Wall Street Journal, gazetarëve të cilët nuk ishin ata që e kishin shkruar artikullin, iu dha pesë ditë kohë për t’u larguar nga Kina.
Vendimi i Kinës erdhi një ditë pasi Departamenti Amerikan i Shtetit shtrëngoi rregullat mbi organizatat e mediave shtetërore kineze që veprojnë në SHBA, duke i klasifikuar ato si misione të huaja.
DASH u kërkoi pesë medieve, përfshirë këtu agjencinë shtetërore të lajmeve Xinhua dhe Rrjetin Global Televiziv Kinez, se ata duhej të paraqisnin listat e të gjithë punonjësve, edhe pse nuk do të kishte asnjë kufizim në raportimin e tyre.
Artikulli i WSJ e quajti përgjigjen e autoriteteve kineze si “sekrete dhe vetë-shërbyese” dhe tha se besimi global ndaj Kinës ishte “tronditur”.
Zëdhënësi i Ministrisë së Jashtme të Kinës, Geng Shuang tha se artikulli ishte “racist” dhe mohonte përpjekjet e Kinës për të luftuar shpërthimin e virusit që ka vrarë më shumë se 2,000 njerëz në vend.
“Populli kinez nuk i mirëpret mediat që publikojnë deklarata raciste dhe sulmojnë me qëllim Kinës” – tha Geng, pa përmendur vendimin për dëbimin e gazetarëve.
Kjo është hera e parë në më shumë se dy dekada që gazetarëve me letra kredenciale të vlefshme janë urdhëruar të largohen nga Kina.
Artikulli në fjalë titullohej “njeriu i sëmurë i Azisë”, një term poshtërues i cili përdorej për të përshkruar Kinën në fund të shekullit XVIII dhe fillimit të shekullit XIX. Në atë kohë, fraza i referohej ndarjeve të brendshme dhe pozitës së dobët të vendit në krahasim me fuqitë globale.
