Partia Socialiste ka lënë jashtë procesit strukturues ish-ministrin e Jashtëm, Ditmir Bushati.
Shkak për këtë është bërë problematika e krijuar pas dorëheqjes së Valdrin Pjetrit, të cilin e kapi ligji i Dekriminalizimit, pasi Pjetri nuk kishte deklaruar arrestimin për trafik droge në Itali.
Bushati nga ana e tij e ka mohuar se ka qenë ai që e ka kandiduar Pjetrin për Bashkinë e Shkodrës.
Lajmi është dhënë nga i deleguari i PS-së, për Shkodrën, Arben Pëllumbi, i cili në një deklaratë për ‘Ora News’ tha: ‘Zoti Bushati ishte drejtues politik i qarkut të Shkodrës, dhe përderisa qarku i Shkodrës pati ato probleme që pati, në këtë pjesë strukturimi zoti Bushati nuk është përfshirë’. – tha Pëllumbi.
Pjetri u zgjodh kryebashkiak i Shkodrës në votimet e 30 qershorit por u dorëhoq pa e marrë ende detyrën pas publikimit të dokumenteve që faktonin arrestimin e tij në Itali.
