“WhatsApp” ka ngritur një padi kundër kompanisë izraelite “NSO Group”, me pretendimin se firma qëndron pas sulmeve kibernetike që infektuan pajisjet telefonike me softuer të dëmshëm.
“WhatsApp” akuzon kompaninë për dërgimin e softuerëve të këqinj në afro 1.400 telefona celularë. Përdoruesit e prekur përfshinin gazetarë, aktivistë për të drejtat e njeriut, disidentë politikë dhe diplomatë.
Mirëpo “NSO Group”, i cili prodhon softuer për mbikëqyrje i ka mohuar akuzat, shkruan “BBC”.
Në një seancë gjyqësore, “WhatsApp” tha se “NSO Group” ka: “zhvilluar softuerë të këqinj në mënyrë që të marrë mesazhet dhe komunikime të tjera pasi të ishin deshifruar në pajisjet e synuara”.
Firma izraelite akuzohet se ka krijuar llogari të ndryshme në “WhatsApp” dhe bëri që kodi i dëmshëm të transmetohet me qëllim të keq te serverët e “WhatsApp” në muajt prill dhe maj.
Sipas “WhatsApp”, ky sulm ka synuar të paktën 100 anëtarë të shoqërisë civile. Përdoruesit e prekur ishin nga disa vende, mes tyre Bahrein, Emiratet e Bashkuara Arabe dhe Meksikë. Kështu që kërkon një urdhër të përhershëm për të ndaluar shërbimet e “NSO Group”.
