Presidenti turk para nisjes së vizitës dy ditore në Serbi ka folur rreth dialogut për normalizim të raporteve ndërmjet Prishtinës dhe Beogradit.
Në një intervistë për edicionin e sotëm të së përditshmes “Politika”, Erdogan ka thënë se arritja e një marrëveshjeje që i kënaq të dyja palët e interesuara është thelbësore për arritjen e stabilitetit dhe paqes afatgjatë në Ballkan.
Kjo është arsyeja pse Turqia mbështet rifillimin e dialogut Beograd-Prishtinë.
“Kjo është arsyeja pse ne mbështesim rinisjen e dialogut Prishtinë-Beograd (në procesin e normalizimit të marrëdhënieve), dhe arritjen e një marrëveshje gjithëpërfshirëse afatgjatë që do të bazohet në konsensusin e dy palëve. Ne jemi gati të bëjmë gjithçka për të zgjidhur këtë problem. Çfarëdo marrëveshje që arrihet nga dy palët, do të jetë e pranueshme për ne”, ka thënë Erdogan.
Mes të tjerash Erdogan foli dhe për marrëdhëniet mes Turqisë dhe Serbisë, ndërsa e konsideroi dhe homologun serv Aleksandar Vuçiç “mikun e tij”.
Megjithatë ai i la një porosi, duke thënë se politika në Serbi duhet të krijojë projekte politike të cilat kontribuojnë në të ardhmen më të mirë të Ballkanit dhe jo në nxitjen e konflikteve në Ballkan.
” Këshillat e mia për të gjithë janë që në vend që të nxisin konflikte në Ballkan, të mendojnë për sa i përket krijimit të projekteve politike që do të kontribuojnë në një të ardhme më të mirë për Ballkanin”, tha Erdogan, citon b92.
Ditën e sotme presidenti turk do të takohet me homologun serb. Ai do të jetë i pranishëm dhe në nisjen e punimeve të autostradës Nish-Sarajevë.
