Gjenden dy turistët belgë të cilës humbën mbrëmjen e kaluar në malet mes Llogarasë dhe Dhërmiut.
Lajmi fillimisht nga Prefekti i Vlorës, Flamur Mamaj. Dy turistët janë shëndoshë e mirë dhe tanimë janë duke bërë kamping në mal.
“Lidhur me situatën për gjetjen e dy turistëve Belg të humbur në malin sipër Iliazit, prej ditës së djeshme me marrjen e lajmit nga ana e Prefektit të Qarkut dhe emergjencave civile në bashkëpunim dhe me Drejtorinë e Policisë së Qarkut Vlorë kanë qenë në terren efektiv të Delta Forcës si dhe banorë të zonës. Kërkimi është bërë në bazë të lokacionit që kanë dërguar vetë shtetasit belg. Konfirmojmë se turistët tashmë janë duke bërë kamping në mal”, tha Mamaj.
Turistët që humbën mbrëmjen e kaluar mësohet se janë të moshës mbi 55-vjeçare, por identiteti i tyre nuk është bërë publik. Policia thotë se turistët kishin dalë për të eksploruar, por kishin ngatërruar rrugën e kthimit.
“Policia e Himarës u vjen në ndihmë dy turistëve të huaj të cilët kishin humbur në një zonë të thellë të Himarës.
Më datë 18.04.2019, rreth orës 15:30, dy turistë të huaj belgë (çift) kanë telefonuar Sallën Operative Vlorë dhe kanë kërkuar ndihmë se kishin humbur në një zonë të thellë malore të Himarës.
Menjëherë pas marrjes së informacionit, shërbimet e policisë Himarë kanë organizuar punën kërkimore për gjetjen e këtyre dy shtetasve duke u shpërndarë në terren rreth 15 forca policie.
Lokalizimi i tyre ka qenë tepër i vështirë pasi kushtet e këtij terreni janë tepër të thepisura dhe të thyera duke vështirësuar kështu komunikimin dhe gjetjen e tyre.
Pas 20 orë kërkimesh intensive në këtë zonë shkëmbore është bërë e mundur gjetja e tyre gati në majë të një mali midis fshatrave Vranisht dhe Iljaz të Himarës.
Ata kishin qenë duke ecur në këmbë me qëllim eksplorimin e turizmit malor të këtyre zonave.
Për shkak të terrenit të vështirë kishin ngatërruar rrugën e kthimit dhe për këtë kërkuan ndihmën e Policisë.
Theksojmë se turistët janë në gjendje të mirë shëndetësore dhe po bëhet transporti i tyre pranë hotelit bazë në të cilin ata po qëndrojnë. Turistët kanë falenderuar Policinë për ndihmën e dhënë.”, thuhet në njoftimin e policisë.
