Është ndaluar në Tiranë autori i dyshuar i grabitjes me armë të autobusit të linjës ‘Itali-Shqipëri’ në Vlorë.
Në pranga ka rënë 35-vjeçari Ylli Murati, banues në Tiranë, i cili akuyzohet se në datën 25 shtator të këtij viti ka vjedhur nën kërcënimin e armës, shoferin dhe pasagjerët e autobusit.
“Kapet dhe ndalohet nga Forca “Shigjeta” një nga autorët e vjedhjes me armë të një autobuzi të ndodhur më 25 shtator 2018 në qytetin e Vlorës.
Shërbimet e Forcës “Shigjeta”, gjatë kontrolleve të ushtruara përgjatë natës dhe orëve të para të mëngjesit të sotëm, kapën dhe ndaluan shtetasin :
Ylli Murati, 35 vjeç, banues në Tiranë.
Ky shtetas është person i shpallur në kërkim nga D.V.P. Vlorë, pasi më datë 25.09.2018 në zonën e Skelës në bashkëpunim dhe me dy persona të tjerë kanë vjedhur nën kërcënimin e armëve të zjarrit shoferin dhe pasagjerët e autobusit të linjës “Itali-Vlorë”.
Gjatë kontrollit të ushtruar këtij shtetasi iu gjet dhe sekuestrua në cilësinë e provës materiale një dozë me lëndë narkotike e dyshuar “Kokainë” .
Po kryhen veprimet e mëtejshme hetimore dhe proceduriale në ngarkim të këtij shtetasi.” – thuhet në njoftimin e policisë.
