Nënpresidenti amerikan JD Vance përjashtoi dërgimin e trupave tokësore amerikane në Iran për të rrëzuar qeverinë e këtij vendi, duke argumentuar se ndryshimi i regjimit duhet të vijë nga vetë populli iranian dhe jo nga ushtria amerikane.
“Nëse populli iranian dëshiron të ngrihet dhe të ndryshojë qeverinë e tij, kjo është çështje e tyre”, tha Vance gjatë një interviste në emisionin “The Joe Rogan Experience”.
“Por ne nuk do të dërgojmë 150 mijë trupa tokësore për të realizuar një ndryshim regjimi. Ne nuk merremi më me këtë. Thjesht nuk merremi”, shtoi ai.
Vance paralajmëroi gjithashtu kundër mundësisë që Irani të kthehet në një shtet të dështuar si Libia, duke thënë se një skenar i tillë mund të shkaktojë rritje të terrorizmit dhe të dërgojë miliona refugjatë drejt Evropës dhe Shteteve të Bashkuara.
Ai tha se objektivat e menjëhershme të administratës amerikane janë mbajtja e hapur e Ngushticës së Hormuzit, mbrojtja e qarkullimit të naftës dhe gazit, si dhe parandalimi i Iranit që të sigurojë armë bërthamore, shkruan Fox.
