Autoritetet e Kosovës kanë zhvilluar një operacion të gjerë më 30 qershor, në bashkëpunim me agjenci ndërkombëtare, duke sekuestruar pasuri me vlerë rreth 1 milion euro në kuadër të hetimeve për pastrim parash.
Sipas Prokurorisë Speciale të Kosovës, operacioni është realizuar në bashkëpunim me autoritetet e Italisë dhe Francës, nën koordinimin e Europol dhe Eurojust.
Hetimi lidhet me një rrjet transnacional të dyshuar për pastrimin e të ardhurave të përfituara nga trafiku i drogës.
Prokuroria bën të ditur se, në bazë të analizave të materialeve të sekuestruara nga autoritetet italiane, janë identifikuar llogari bankare, biznese, pasuri të paluajtshme dhe automjete luksoze të lidhura me një çift shtetasish kosovarë që jetojnë në Itali.
Çifti dyshohet se është i përfshirë në një proces gjyqësor në Itali për pastrim parash dhe është arrestuar më herët në Francë, në shtator të vitit 2025.
Sipas hetimeve, gjatë operacioneve të mëparshme janë gjetur më shumë se 56 kilogramë shufra ari dhe rreth 2.5 milionë euro të fshehura në automjete të modifikuara.
Autoritetet theksojnë se vetëm në një fazë të mëparshme të hetimit janë sekuestruar mbi 30 milionë euro asete të lidhura me rrjetin kriminal.
Hetuesit kanë konstatuar se paratë e përfituara nga trafiku i drogës janë konvertuar në ar për të fshehur origjinën e tyre dhe për të lehtësuar transportin ndërkufitar, veçanërisht drejt Kosovës, Turqisë dhe Marokut.
Sipas autoriteteve italiane, rrjeti kriminal ka vepruar përmes bizneseve të specializuara në shkrirjen e metaleve të çmuara në Itali, ku paratë e gatshme janë transformuar në ar me vlerë të barabartë monetare.
Operacioni është pjesë e një hetimi më të gjerë të nisur në vitin 2025, kur autoritetet italiane dhe franceze goditën një rrjet të strukturuar kriminal, duke arrestuar disa persona dhe duke sekuestruar miliona euro.
Hetimet vijojnë, ndërsa autoritetet nuk përjashtojnë zgjerimin e mëtejshëm të dosjes dhe identifikimin e personave të tjerë të përfshirë në rrjet.
