Qeveria e Mbretërisë së Bashkuar po planifikon të shkurtojë 6 miliardë paund (rreth 8 miliardë dollarë) nga investimet për projekte si shkollat dhe spitalet gjatë katër viteve të ardhshme, me qëllim financimin e një rritjeje prej 15 miliardë paundësh në shpenzimet për mbrojtjen, sipas raportimeve të mediave britanike.
Downing Street ka qenë në negociata me ministrat e qeverisë lidhur me Planin e Investimeve në Mbrojtje, i cili është vonuar prej kohësh, pasi u vendos që fondet shtesë për ushtrinë të mos sigurohen përmes rritjes së taksave apo shtimit të borxhit publik.
Rritja e shpenzimeve është pjesë e angazhimit për ta çuar buxhetin e mbrojtjes nga 2.3% e Prodhimit të Brendshëm Bruto në 2.6% deri në vitin 2027 dhe në 3.5% deri në vitin 2035.
Të gjitha departamentet qeveritare do të përballen me të paktën një ulje prej 1% të buxheteve të tyre kapitale, që përkthehet në rreth 1.5 miliardë paund në vit, siç raportoi fillimisht gazeta The Sunday Times. Disa ministri pritet të përballen me shkurtime edhe më të thella.
Në këmbim, Ministria e Mbrojtjes ka pranuar një paketë më të vogël se 18 miliardë paundët shtesë që kishte kërkuar për katër vitet e ardhshme.
Një zëdhënës i qeverisë nuk pranoi të komentonte raportimet për shkurtimet në departamentet e tjera, por tha se plani i mbrojtjes do të “sigurojë pajisjet dhe teknologjinë më të mirë për forcat e vijës së parë, duke investuar njëkohësisht në rritjen e ekonomisë britanike”.
“Po punojmë për të finalizuar planin dhe ai do të publikohet sa më shpejt të jetë e mundur,” shtoi ai.
Plani i Investimeve në Mbrojtje duhej fillimisht të ishte publikuar në vjeshtën e vitit 2025, por është vonuar ndjeshëm. Të dielën, Sekretari i Drejtësisë dhe zëvendëskryeministri David Lammy deklaroi se dokumenti përfundimtar do të bëhet publik para samitit të NATO-s më 7-8 korrik, shkruan Bloomberg.
Sipas një raporti të publikuar të dielën nga një komision parlamentar, vonesat e gjata kanë dëmtuar besueshmërinë e Britanisë së Madhe përballë aleatëve të saj dhe kanë sjellë kosto shtesë për qeverinë.
Geoffrey Clifton-Brown, kryetar i Komitetit të Llogarive Publike, tha:
“Çdo ministër që përpiqet të justifikojë këtë vonesë duhet të pyesë veten se çfarë mesazhi u është dhënë publikut, aleatëve të Mbretërisë së Bashkuar dhe kundërshtarëve të saj nga kjo zvarritje burokratike, dhe thjesht të kërkojë falje.”
Ai shtoi se vonesa ka rritur kostot e prokurimeve ushtarake dhe “ka penguar përpjekjet e qeverisë për të modernizuar forcat e armatosura”.
