Presidenti Donald Trump tha të enjten se po emëron Jay Clayton, prokurorin kryesor të Distriktit Jugor të Nju Jorkut, si drejtorin e ardhshëm të inteligjencës kombëtare, pas kundërshtimeve nga ligjvënësit amerikanë për zgjedhjen e mëparshme të Trump për ta mbajtur përkohësisht këtë rol.
“Pak njerëz në komunitetin ligjor respektohen në nivelin e Jay-t. I bëj thirrje Senatit të SHBA-së ta konfirmojë Jay sa më shpejt,” tha Trump në një postim në Truth Social.
Biografia zyrtare e Clayton thotë se ai është ish-kryetar i Komisionit të Letrave me Vlerë dhe Bursës së SHBA-së (SEC) dhe se si prokuror ka trajtuar çështje të rëndësishme, përfshirë aktakuzën për narco-terrorizëm ndaj ish-presidentit të Venezuelës Nicolás Maduro.
Megjithatë, thuhet se Clayton nuk ka përvojë në inteligjencë apo në sigurinë kombëtare tradicionale.
Nuk ishte menjëherë e qartë nëse emërimi i tij do t’i jepte fund kundërshtimeve demokratike ndaj zgjedhjes së Trump për Bill Pulte si drejtor të përkohshëm të inteligjencës kombëtare dhe nëse do të zhbllokonte ngërçin në Kongres mbi rinovimin e një programi të mbikëqyrjes së huaj që skadon të premten, shkruan Reuters.
Dhoma e Përfaqësuesve e kontrolluar nga republikanët hodhi poshtë të enjten një zgjatje afatshkurtër të nenit 702 të ligjit FISA për mbikëqyrjen e inteligjencës së huaj, të cilin Trump e ka kërkuar.
Trump tha se Pulte, kreu i agjencisë federale të strehimit, do të marrë detyrën si drejtor i përkohshëm më 19 qershor, duke zëvendësuar Tulsi Gabbard, e cila dha dorëheqjen me efekt më 30 qershor.
