Mijëra banorë lokalë mbyllën të shtunën autostradën Brenner në Austri, një korridor jetik veri-jug përmes Alpeve që lidh Gjermaninë me Italinë, në shenjë proteste ndaj kamionëve dhe turistëve që, sipas tyre, bllokojnë vazhdimisht rrugët e zonës.
Protesta u drejtua nga Karl Mühlsteiger, kryebashkiaku i Gries am Brenner, një prej qyteteve të vendosura në hijen e kësaj arterieje që kalon përmes Luginës së ngushtë Wipp mbi kolona të mëdha betoni.
Çështja e trafikut të tepërt dhe ndotjes në këtë luginë, e cila të çon në Qafën e Brennerit, ka qenë prej dekadash një burim tensionesh mes Austrisë dhe Gjermanisë. Autoritetet lokale në provincën austriake të Tirolit kanë vendosur masa të ndryshme për të kufizuar fluksin e trafikut, të cilat shpesh kanë shkaktuar reagime të forta nga pala gjermane.
“Po bëni histori!” raportoi agjencia austriake e lajmeve APA se u tha Mühlsteiger turmës prej rreth 3,000 protestuesish që u mblodhën në autostradë në orën 13:00 për ta bllokuar simbolikisht atë, disa orë pasi policia kishte mbyllur të dy skajet e korridorit. Makinat që mbërrinin aty u detyruan të ktheheshin.
Mbyllja tetë-orëshe nga ora 11:00 nuk shkaktoi kaosin e pritshëm, pasi shumica e shoferëve shmangën zonën, edhe pse ishte periudhë pushimesh shkollore në disa lande gjermane, përfshirë Bavarinë fqinje.
Trenat që kalonin në të njëjtën linjë u raportuan të ishin të mbushur me pasagjerë.
Rruga provinciale paralele me autostradën u mbyll gjithashtu për të gjithë, përveç banorëve dhe trafikut lokal.
Në Itali, një zjarrvënie e dyshuar ndaj pajisjeve të kontrollit elektrik gjatë natës ndërpreu trafikun hekurudhor midis Peri dhe Dolçe, pranë Veronës, në linjën Verona Porta Nuova–Brenner.
Hetuesit po shqyrtojnë mundësinë e lidhjeve me grupe radikale mjedisore ose anarkiste, shkruan Reuters.
