Ushtria izraelite ka lëshuar urdhra evakuimi për pjesë të mëdha të Libanit jugor, duke i shpallur këto zona “zona luftimi” përpara sulmeve të reja kundër Hezbollahut.
Forcat Mbrojtëse të Izraelit (IDF) u bënë thirrje banorëve të zhvendosen në veri të lumit Zahrani, rreth 40 km (25 milje) nga kufiri. IDF tha se do të vepronte “me forcë ekstreme”, duke akuzuar Hezbollahun për shkelje të përsëritura të armëpushimit.
Ky është urdhri më i madh i evakuimit që nga hyrja në fuqi e armëpushimit më 17 prill, duke mbuluar rreth 14% të territorit libanez.
Më herët të mërkurën, Izraeli kreu sulme ajrore në qytetin jugor të Tiros. Hezbollahu, i cili vetë akuzoi Izraelin për shkelje të armëpushimit, tha se luftëtarët e tij ishin përleshur me trupat izraelite.
Sulmet e së mërkurës erdhën pasi kryeministri izraelit Benjamin Netanyahu njoftoi një zgjerim të operacionit të tij tokësor pas sulmeve me dronë të Hezbollahut ndaj trupave që pushtuan një pjesë të Libanit jugor dhe ndaj civilëve në Izraelin verior, raporton BBC.
IDF ka lëshuar nëntë paralajmërime për evakuim në 24 orët e fundit, duke nxitur frikën e një përshkallëzimi të madh përgjatë kufirit Izrael-Liban dhe perspektivën e zhvendosjes masive të përsëritur.
Urdhri i së mërkurës për Tirin, një nga qytetet më të mëdha në Libanin jugor, u pasua me shpejtësi nga sulmet ajrore.
