Aeroporti në ishullin Reunion ka inauguruar terminalin e parë bioklimatik në botë në një zonë tropikale, një projekt inovativ që funksionon pa ajër të kondicionuar dhe përdor vetëm ventilim natyror.
Sipas drejtuesve të aeroportit Roland Garros Airport, terminali i ri i mbërritjeve dhe bagazheve konsumon rreth 55–60% më pak energji krahasuar me ndërtesat tradicionale me kondicionim, duke ulur ndjeshëm edhe emetimet e CO₂ – nga rreth 8,000 ton në vit në më pak se 1,000.
Projekti është frymëzuar nga arkitektura tradicionale lokale dhe ndërtesat bioklimatike të rajonit, duke shfrytëzuar erërat natyrore për të krijuar një ambient të freskët, përcjell Euronews.
Një sistem me mbi 800 dritare të automatizuara (ventilime “louvre”) rregullon qarkullimin e ajrit në kohë reale, bazuar në të dhënat e një stacioni meteorologjik.
Një element kyç i projektit është “kanioni bioklimatik”, një strukturë qendrore që përshpejton rrjedhën e ajrit dhe krijon efekt thithjeje, duke lejuar hyrjen e ajrit nga fasadat dhe daljen e tij nga çatia. Kjo krijon një ndjesi freskie deri në 4 gradë më të ulët se temperatura reale.
Terminali, me një sipërfaqe prej 13,000 m², është ndërtuar me kombinim qelqi, metali dhe druri dhe përfshin edhe bimë endemike të ishullit, duke krijuar një lidhje të drejtpërdrejtë mes hapësirës së brendshme dhe natyrës.
Projekti ka kushtuar rreth 65 milionë euro dhe është financuar në masën 58% nga Komisioni Evropian përmes politikës së kohezionit. Ndërtimi ka përfshirë kryesisht kompani lokale dhe ka krijuar rreth 1,000 vende pune direkte dhe indirekte.
Ky aeroport, i vlerësuar edhe me çmime ndërkombëtare për arkitekturë, synon të arrijë autonomi energjetike deri në vitin 2030, duke u kthyer në një model për infrastrukturën e qëndrueshme në sektorin e aviacionit.
