Çmimet e naftës kanë shënuar rënie të lehtë në tregjet e hershme të së hënës, ndërsa investitorët po ndjekin nga afër zhvillimet në Lindjen e Mesme dhe situatën në Ngushticën e Hormuzit.
Sipas Euronews, nafta amerikane (WTI) u ul me 0.28% duke u tregtuar rreth 101.65 dollarë për fuçi, ndërsa nafta Brent, referenca ndërkombëtare, ra lehtë me 0.06% në rreth 108.10 dollarë për fuçi.
Tregjet po reagojnë ndaj deklaratave të Presidentit amerikan Donald Trump, i cili njoftoi nisjen e operacionit “Project Freedom”, me qëllim shoqërimin e anijeve ndërkombëtare në Ngushticën e Hormuzit. Megjithatë, Irani e ka kundërshtuar këtë plan, duke shtuar pasigurinë në tregjet energjetike.
Sipas analistëve, situata në këtë ngushticë strategjike mbetet faktor kyç për çmimet globale të energjisë, pasi një numër i madh anijesh dhe transportuesish mbeten të bllokuar në Gjirin Persik për shkak të tensioneve.
Ndërkohë, tregjet aziatike kanë shënuar lëvizje të përziera: bursat në Hong Kong dhe Korenë e Jugut kanë regjistruar rritje të ndjeshme, ndërsa tregjet në Australi kanë pësuar rënie të lehtë. Disa tregje në rajon, përfshirë Japoninë dhe Kinën, kanë qenë të mbyllura për shkak të festave.
Në Wall Street, indekset kryesore kanë vijuar trendin pozitiv, të mbështetura nga rezultate të forta financiare të kompanive të mëdha teknologjike, përfshirë Apple, e cila ka raportuar fitime më të larta se pritshmëritë.
Megjithatë, pasiguria rreth çmimit të naftës dhe konfliktit në Iran mbetet një nga faktorët kryesorë që po ndikon në perspektivën e ekonomisë globale.
