Plani i SHBA-së për të tërhequr rreth 5 mijë trupa nga Gjermania ka nxitur reagime të ndryshme në të dy anët e Atlantikut, mes shqetësimeve për ndikimin në sigurinë europiane dhe unitetin e NATO-s, përcjell Reuters.
Ministri gjerman i Mbrojtjes, Boris Pistorius, deklaroi se vendimi duhet të shërbejë si një shtysë për Europën që të forcojë kapacitetet e veta mbrojtëse. Sipas tij, vendet europiane duhet të marrin më shumë përgjegjësi për sigurinë e tyre.
Nga ana tjetër, dy ligjvënës të lartë republikanë në SHBA, Roger Wicker dhe Mike Rogers, shprehën shqetësim për tërheqjen, duke argumentuar se trupat nuk duhet të largohen nga Europa, por të zhvendosen më në lindje për të forcuar parandalimin ndaj Rusisë.
Vendimi i Pentagonit vjen në një moment tensionesh mes SHBA-së dhe Europës, të lidhura me luftën në Iran dhe çështjet tregtare. Tërheqja pritet të realizohet brenda 6 deri në 12 muajve, por ende nuk është e qartë se cilat baza do të preken apo ku do të zhvendosen trupat.
Ndërkohë, NATO ka bërë të ditur se po bashkëpunon me SHBA-në për të kuptuar detajet e planit, ndërsa disa vende aleate kanë shprehur shqetësim për ndikimin e mundshëm në sigurinë rajonale.
Ky zhvillim shihet si një tjetër sinjal i presionit që administrata amerikane po ushtron ndaj aleatëve europianë për të rritur shpenzimet dhe kapacitetet në mbrojtje.
