Deputeti i Partisë Demokratike, Belind Këlliçi, ka reaguar pas vendimit të Gjykatës Kushtetuese, e cila rrëzoi kërkesën e kryeministrit Edi Rama lidhur me masën e sigurisë ndaj zëvendëskryeministres dhe ministres së Infrastrukturës, Belinda Balluku.
Sipas vendimit të Kushtetueses, mbetet në fuqi masa e pezullimit nga funksionet publike për Belinda Ballukun.
Në një deklaratë publike, Këlliçi e cilësoi vendimin si një goditje për qeverinë, duke deklaruar se, sipas tij, Gjykata Kushtetuese nuk arriti të mbrojë zëvendëskryeministren.
Ai shtoi se vendimi erdhi si rezultat i reagimit qytetar, veprimeve të opozitës dhe, sipas tij, edhe presionit ndërkombëtar. Këlliçi akuzoi kryeministrin Edi Rama për përpjekje për të mbrojtur çështjen dhe e cilësoi vendimin si një hap drejt drejtësisë, ndonëse me vonesë.
Deputeti i PD-së deklaroi gjithashtu se përgjegjësia politike për mbrojtjen e Ballukut i mbetet tashmë kryeministrit, duke iu referuar procedurave të mëtejshme parlamentare dhe kërkesave të SPAK.
Në fund të reagimit të tij, Këlliçi bëri thirrje për pjesëmarrje në protestën e paralajmëruar nga opozita më 10 shkurt, në Bulevardin “Dëshmorët e Kombit”.
