Kryeministri izraelit Benjamin Netanyahu po shqyrton një udhëtim në Shtetet e Bashkuara në fund të këtij muaji, në një moment tensionesh të shtuara me Iranin dhe përforcimi të ndjeshëm të pranisë ushtarake amerikane në Lindjen e Mesme, raportoi të martën portali ynet.
Vizita lidhet me konferencën vjetore të AIPAC, e planifikuar të mbahet në Uashington më 22–24 shkurt. Zyrtarë nga Zyra e Kryeministrit konfirmuan se udhëtimi është në shqyrtim dhe se po diskutohet gjithashtu mundësia e një takimi me presidentin amerikan Donald Trump.
Nëse vizita realizohet, Irani pritet të dominojë axhendën, veçanërisht në rast se deri atëherë Shtetet e Bashkuara nuk kanë ndërmarrë veprime ushtarake kundër Teheranit. Ditët e fundit, ushtria amerikane ka shtuar ndjeshëm praninë e saj në rajon, përfshirë dislokimin e një skuadriljeje avionësh luftarakë F-15E. Komanda Qendrore e SHBA-së publikoi imazhe të avionëve, duke deklaruar se prania e tyre synon rritjen e gatishmërisë luftarake dhe forcimin e stabilitetit rajonal.
Përforcimi përfshin edhe transferimin e dy avionëve transportues C-17A Globemaster III nga Britania në një bazë ushtarake në Jordani, për të mbështetur operacionet ajrore. Paralelisht, Uashingtoni ka njoftuar plane për dërgimin në rajon të aeroplanmbajtëseve USS Abraham Lincoln dhe USS Gerald R. Ford, megjithëse mbërritja e tyre pritet të marrë më shumë kohë.
Retorikë gjithnjë e më e ashpër nga Teherani
Nga ana tjetër, Irani ka rritur ndjeshëm tonet. Ligjvënës iranianë paralajmëruan se çdo sulm ndaj Liderit Suprem, Ayatollah Ali Khamenei, do të konsiderohej si shpallje lufte ndaj botës islame dhe mund të çonte në shpalljen e një “fetvaje” që bën thirrje për xhihad. Deklarata erdhi pas komenteve të presidentit Masoud Pezeshkian, i cili tha se një goditje ndaj liderit suprem do të nënkuptonte “luftë totale”, ndërsa Trump ka ripërsëritur thirrjet për ndryshim regjimi në Iran.
Në planin e brendshëm, përleshjet e gjera mes forcave të sigurisë dhe protestuesve janë zbehur ditët e fundit, por një ndërprerje masive e internetit vazhdon. Ky bllokim, më i gjati në historinë e Republikës Islamike, nisi më 8 janar, kur protestat kundër regjimit u shndërruan në trazira të përhapura. Gjatë shtypjes së dhunshme nga Garda Revolucionare, autoritetet iraniane pranuan se të paktën 5,000 persona kanë humbur jetën.
Qeveria ka ndërprerë aksesin në internet për të kufizuar organizimin e protestuesve dhe për të penguar daljen e pamjeve të dhunës jashtë vendit. Edhe pse herë pas here janë rikthyer lidhje të pjesshme, qasja mbetet rreptësisht e kufizuar, ndërsa përdoruesit raportojnë se shërbime bazë, si kërkimi në Google, janë kryesisht të paarritshme, shkruan Ynet.
