Prokuroria e Fierit ka përfunduar hetimet dhe ka dërguar për gjyq dy zyrtarë të Bashkisë së Fierit dhe një drejtor të tatimeve në rajonin jugor, për shpërdorim detyre.
Sipas organit të akuzës, drejtoresha e përgjithshme e Taksave dhe Urbanistikës, Adela Hysenaj, e cila më parë ka mbajtur postin e nënkryetares së bashkisë, nuk ka marrë masat e nevojshme për vendosjen e kasës fiskale në pikat e parkimit që administrohen nga bashkia, duke shmangur mbledhjen e taksave në vlera të konsiderueshme.
Hetimi ka zbuluar se, përmes ndikimit të saj mbi drejtoritë në varësi, janë realizuar faturime fiktive për disa subjekte, të cilat u taksoheshin me vlera më të ulëta.
Në një rast specifik, është lëshuar një vërtetim që pohonte se një subjekt nuk kishte asnjë detyrim për të paguar taksa, megjithëse kishte borxhe të papaguara.
Zyrtarët akuzohen për mosarkëtimin e mbi 400 mijë eurove nga taksat e parkingut publik që administron bashkia, duke favorizuar persona të caktuar dhe duke shpërdoruar detyrën në disa raste.
Gjithashtu, Drejtoresha e Taksave në bashki, Anisa Cjapi, dyshohet se ka favorizuar disa subjekte përmes faturave fiktive që nuk përputheshin me vlerat reale të taksave.
Ndërkohë, Vasil Çeku, drejtor i DVKT-së për Rajonin Jugor, akuzohet se ka urdhëruar inspektorët të kryejnë kontrolle vetëm në një subjekt tregtar, pa një urdhër pune të dhënë më parë nga Drejtoria e Përgjithshme e Tatimeve.
Njoftimi i prokurorisë:
Abuzuan me detyrën, Prokuroria e Fierit dërgon në gjyq dy drejtoreshat e Bashkisë si dhe drejtorin e DVKT-së Rajoni Jugor
Prokuroria pranë Gjykatës së Shkallës së Parë të Juridiksionit të Përgjithshëm Fier përfundoi hetimet dhe dërgon në gjyq shtetasen A.H., Drejtoreshë e Përgjithshmë të Taksave dhe Urbanistikës, shtetasen A.C., Drejtoreshës së Taksave dhe Tarifave Vendore në Bashkinë Fier si dhe shtetasin V.Ç. për veprat penale ‘Shpërdorim detyre’ dhe ‘Ushtrimi i ndikimit të paligjshëm ndaj personave që ushtrojnë funksione publike’, parashikuar nga nenet 248 dhe 245/1 të Kodit Penal.
Nga hetimet mbi procedimin penal nr.68 të vitit 2025, të regjistruar kryesisht për këto dy vepra penale, rezultoi e provuar se, e pandehura A.H., në cilësinë e Drejtoreshës së Përgjithshme të Taksave dhe Urbanistikës në Bashkinë Fier, nuk ka marrë masat për vendosjen e kasës fiskale në sistemin e parkimit të Bashkisë, duke lejuar shmangien nga pagimi i detyrimeve tatimore në vlera të larta. Gjithashtu, mbi ushtrimin e ndikimit të paligjshëm prej të pandehurës mbi drejtoritë në varësi, janë realizuar faturime fiktive të subjekteve, duke i taksuar në vlera më të ulta. E pandehura A.H., ka ushtruar ndikim të paligjshëm edhe tek Drejtoresha e Takasve në Bashkinë Fier për të kryer përllogaritje të parregullt të taksave subjektit “R…” shpk, si dhe për të lëshuar një vërtetim se ky subjekt nuk kishte detyrime, ndërkohë që ai ka pasur taksa pa paguar në një vlerë të konsiderueshme.
E pandehura A.C., në cilësinë e Drejtoreshës së Taksave dhe Tarifave Vendore në Bashkinë Fier, ka lëshuar (konceptuar) fatura të taksave dhe tarifave mbi vlerën reale për subjekte të caktuara dhe, pasi u janë njoftuar subjekteve të cilët kanë bërë ankesa, vlera ka ndryshuar, duke u ulur në disa raste edhe tej parashikimeve të vendosura nga Këshilli Bashkiak. E pandehura ka realizuar faturime fiktive të subjekteve, duke i taksuar ata me taksa në vlerë më të ulët se ajo për të cilën ata duhej të taksoheshin. Gjithashtu, e pandehura nuk ka marrë asnjë masë për fiskalizimin e pikave të parkimit të mjeteve në administrimin e Bashkisë.
Ndërkohë, i pandehuri V.Ç., me detyrë Drejtor i DVKT Rajoni Jugor, me urdhrin e nxjerrë prej tij ka detyruar inspektorët të kryejnë kontroll në një subjekt tregtar, pa pasur më parë një urdhër pune nga DPT. Pas kryerjes së kontrollit, i pandehuri nuk ka kryer procedurën ligjore për të kërkuar rikontroll në Drejtorinë e Përgjithshme të Tatimeve dhe nuk ka mbikëqyrur fushatën sensibilizuese, pasi nuk është kontrolluar asnjë subjekt tjetër.
Në përfundim, Prokuroria pranë Gjykatës së Shkallës së Parë Juridiksionit të Përgjithshëm Fier dërgoi çështjen në gjyq në ngarkim të të pandehurve:
- A.H., e akuzuar për kryerjen e veprave penale “Shpërdorimi i detyrës” dhe “Ushtrimi i ndikimit të paligjshëm ndaj personave që ushtrojnë funksione publike”, parashikuar nga nenet 248 dhe 245/1 prg.3 të Kodit Penal;
- A.C., i akuzuar për kryerjen e veprës penale “Shpërdorimi i detyrës”, e parashikuar nga neni 248 i Kodit Penal;
- V.Ç., i akuzuar për veprën kryerjen e veprës penale “Shpërdorimi i detyrës”, e parashikuar nga neni 248 i Kodit Penal.
Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier shpreh angazhimin e plotë dhe vënien para përgjegjësisë ligjore të të gjithë punonjësve shtetërorë ose në shërbim publik që kryejnë vepra penale kundër veprimtarisë shtetërore.
Sqarim: Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë.
