Një stuhi e madhe diellore, e vlerësuar si e dyta më e fuqishme në pesë vjet dhe që zgjati mbi dyzet orë, goditi Tokën këtë javë, raportuan shkencëtarë nga disa vende. Dukuria natyrore ka shkaktuar shfaqje shumëngjyrëshe të Aurora Borealis në gjithë Hemisferën Veriore.
Në një deklaratë të premten, Instituti i Kërkimeve Hapësinore i Akademisë Ruse të Shkencave tha se një shpërthim masiv diellor ishte regjistruar më herët gjatë ditës. Ngjarja kishte origjinën në të njëjtën zonë që kishte prodhuar një shpërthim edhe më të fuqishëm vetëm dy ditë më parë. Kjo ngjarje ishte përgjegjëse për stuhinë më të rëndë diellore që nga maji 2024, shkruan Rt.
Sipas shkencëtarëve rusë, “në kundërshtim me pritshmëritë shpërthimet nuk tregojnë shenja të pakësimit, por janë në rritje”.
Në një deklaratë të veçantë, Instituti i Kërkimeve Hapësinore vlerësoi se stuhia diellore në fjalë kishte arritur intensitetin e nivelit G4.7 në shkallën e stuhive NOAA dhe zgjati rreth 42 orë. Shkalla e Administratës Kombëtare Oqeanike dhe Atmosferike të SHBA-së është sistemi i matjes i njohur ndërkombëtarisht për stuhi të tilla, ku G5 është shkalla më e lartë që tregon një ngjarje “ekstreme”.
Të mërkurën, Shërbimi Gjeologjik Britanik deklaroi se e ashtuquajtura “stuhi kanibale” kishte ndërprerë komunikimet dhe saktësinë e satelitëve të Sistemit Global të Pozicionimit (GPS).
Një stuhi gjeomagnetike ndodh kur grimca të ngarkuara nga atmosfera e diellit dërgohen me shpejtësi drejt planetit tonë në formë shpërthimesh masive koronale. Këto të fundit janë shpërthime të mëdha të plazmës dhe fushës magnetike nga atmosfera e jashtme e diellit në hapësirë. Ato grimca të ngarkuara elektrikisht më pas godasin fushën magnetike të Tokës. Si teknologjia ashtu edhe njerëzit e ndjeshëm mund të preken negativisht.
Stuhia e fundit gjeomagnetike ka çuar në shfaqje të Aurora Borealis në gjithë Hemisferën Veriore, duke u vërejtur në Kanada dhe veçanërisht në SHBA ditët e fundit. Dukuritë shumëngjyrëshe, të cilat zakonisht kufizohen në zonat pranë Rrethit Arktik, ishin të dukshme deri në Florida dhe Alabama në jug këtë javë.
