Një burrë kanadez është dënuar me gati dy vite burg për vjedhjen e një fotografie të famshme të Sir Winston Churchill, e njohur si “Luani që ulëriu” (The Roaring Lion), një nga imazhet më ikonike të shekullit të 20-të.
Jeffrey Wood pranoi fajësinë për vjedhjen e fotos origjinale nga hoteli Château Laurier në Ottawa, e cila ndodhi mes Krishtlindjes 2021 dhe fillimit të janarit 2022. Ai gjithashtu pranoi akuzën për falsifikim.
Fotografia e ish-kryeministrit të kohës së luftës së Britanisë, e realizuar nga fotografi Yousuf Karsh në vitin 1941, është përdorur edhe në kartëmonedhën prej 5 paundësh në Mbretërinë e Bashkuar.
Policia e Ottawës bëri të ditur se fotografia u gjet vitin e kaluar në Genova të Italisë në pronësi të një blerësi privat, i cili nuk ishte në dijeni se ishte e vjedhur.
Imazhi tregon Churchill-in me një shprehje të rreptë në fytyrë, pak pas një fjalimi që kishte mbajtur në parlamentin kanadez në moshën 67-vjeçare.
Zëvendësimi i fotos origjinale me një kopje u zbulua vetëm në gusht të vitit 2022 nga një punonjës i hotelit.
Sipas mediave kanadeze, Wood ka thënë se e mori fotografinë për të siguruar para për vëllanë e tij, i cili po përballej me probleme të shëndetit mendor, përcjell BBC.
Gjatë shpalljes së vendimit, gjykatësi Robert Wadden deklaroi: “Është një pikë krenarie kombëtare që një portret i realizuar nga një fotograf kanadez ka arritur një famë të tillë.”
“Në shoqërinë tonë ekziston një element besimi që lejon pronat e tilla të ekspozohen dhe të shijohen nga të gjithë kanadezët. Të vjedhësh, të dëmtohesh apo të trafikosh me pronë të tillë do të thotë të shkelësh këtë besim,” shtoi ai.
Menaxherja e përgjithshme e hotelit Château Laurier, Geneviève Dumas, u shpreh për CBC se ishte e kënaqur që “historia kanadeze po vlerësohet.”
Wood u dënua me “dy vite më pak një ditë”, një formulim ligjor në Kanada që nënkupton se dënimi do të vuhet në një institucion provincial dhe jo në një burg federal.
Avokati i tij e cilësoi dënimin si “të panevojshëmisht të ashpër”, duke theksuar se klienti i tij ishte një shkelës për herë të parë.
