Microsoft do të shkurtojë rreth 4,800 vende pune, ose rreth 2% të fuqisë së saj punëtore, ndërsa ristrukturon divizionin Xbox, duke argumentuar se industria e lojërave po përballet me “krizën më të rëndë të harduerit në historinë e saj”.
Kompania me vlerë 2.9 trilionë dollarë u tha punonjësve në një memo të hënën se pozicionet që do të eliminohen “nuk do të zëvendësohen nga inteligjenca artificiale (AI)”, por shtoi se “AI po ndryshon mënyrën se si kryhet puna”.
Rreth 3,200 nga shkurtimet do të prekin ekipin e Xbox, me 1,600 largime të menjëhershme dhe 1,600 të tjera gjatë vitit të ardhshëm. Pjesa tjetër e largimeve do të vijë nga divizioni komercial i Microsoft.
Drejtoresha ekzekutive e Xbox, Asha Sharma, u tha punonjësve në një email se “biznesi sot nuk është i shëndetshëm”, duke përmendur marzhe fitimi “3 deri në 10 herë më të ulëta se ato të platformave dhe kompanive të ngjashme të publikimit të lojërave”.
Ajo bëri thirrje për një “rifillim” të Xbox, ndërsa industria po përballet me kërkesë të dobët për harduer, rritjen e lojërave online dhe çmime më të larta të komponentëve.
Biznesi i konzolave është ngadalësuar pas bumit të periudhës së pandemisë, ndërsa zhvilluesit e lojërave janë përballur me rritje të kostove të zhvillimit dhe kërkesa në rritje për AI, e cila ka shtuar edhe koston e çipave.
Ky vendim vjen vetëm tre vjet pasi Microsoft përfundoi blerjen më të madhe në historinë e tij, atë të kompanisë Activision Blizzard për 75 miliardë dollarë, me synimin për të forcuar Xbox duke zgjeruar portofolin e lojërave dhe duke tërhequr më shumë abonentë në shërbimin Game Pass, shkruan FT.
Megjithatë, aksionet e Microsoft kanë rënë me një të pestën që nga fillimi i vitit, pasi investitorët po vënë në dyshim nëse kompania do të arrijë të gjenerojë fitime të mjaftueshme për të justifikuar investimet e mëdha në inteligjencën artificiale.
Nën drejtimin e ish-drejtorit ekzekutiv Phil Spencer, Xbox investoi ndjeshëm në studio zhvillimi lojërash për të nxitur përdoruesit të abonoheshin në Xbox Game Pass. Sharma tha se “ndonëse këto biznese kanë krijuar vlerë të konsiderueshme, ato nuk u rritën me ritmin që prisnim”.
Ajo shtoi se Xbox do të shesë katër nga studiot e saj të zhvillimit të lojërave, ndërsa do të reduktojë gjithashtu stafin në njësitë e mbetura, përfshirë Activision, Blizzard dhe Mojang, krijuesen e Minecraft.
Sipas Sharma, “në një vit tipik, ne humbnim 64 cent për çdo dollar që investonim” në studiot e lojërave.
