Të paktën 15 trupa migrantësh, mes tyre edhe një vajzë e mitur, janë nxjerrë në breg përgjatë vijës bregdetare lindore të Libisë në Mesdhe gjatë javës së kaluar, pasi varka me të cilën udhëtonin besohet se është mbytur, thanë për Reuters burime të sigurisë, marinës dhe mjekësore të shtunën.
Sipas një burimi të marinës, mjeti lundrues transportonte rreth 61 persona, bazuar në dëshmitë e 10 të mbijetuarve.
Trupat u gjetën në disa zona përgjatë bregdetit të Tobrukut, një qytet pranë kufirit me Egjiptin, shtuan burimet. Dy zyrtarë të sigurisë thanë se trupat ishin në gjendje të avancuar dekompozimi dhe paralajmëruan se mund të zbulohen edhe trupa të tjerë.
Fotografitë e publikuara në Facebook nga Kryqi i Kuq i Tobrukut tregonin vullnetarë të veshur me kostume të bardha mbrojtëse duke nxjerrë trupat nga brigjet shkëmbore dhe duke i vendosur ato në qese plastike të bardha.
Që nga rrëzimi i Muammar Gaddafit në një kryengritje të mbështetur nga NATO në vitin 2011, Libia është shndërruar në një rrugë tranziti për migrantët që largohen nga konfliktet dhe varfëria për të arritur në Evropë, përmes rrugëve të rrezikshme në shkretëtirë dhe nëpër Mesdhe.
Ekonomia libiane, e varur nga nafta, është gjithashtu një faktor tërheqës për migrantët e varfër që kërkojnë punë.
Veçmas, Qendra e Mjekësisë Emergjente dhe Mbështetjes në qytetin Khums, e cila funksionon nën Ministrinë e Shëndetësisë në Tripoli, njoftoi se ekipet e saj mjekësore trajtuan 13 migrantë pasi varka e tyre u mbyt në brigjet e vendit, shkruan Reuters.
