Kryeministri Edi Rama i është përgjigjur ish-kryeministrit grek Alexis Tsipras lidhur me reagimet e ngritura në Greqi pas incidentit të ndodhur në Zvërnec, ku mbeti i lënduar edhe një shtetas grek.
Në një letër publike, Rama akuzon partinë e re të Tsipras se ka kontribuar në shndërrimin e një ngjarjeje të izoluar në një çështje me dimensione politike, duke injoruar faktet e verifikuara.
“Shpresoj të jesh në formë të shkëlqyer. Më fal që po të shqetësoj, por doja të ndaja habinë time se sa shpejt edhe partia juaj e re ka kontribuar në transformimin e një incidenti krejtësisht të izoluar në një çështje me rëndësi më të gjerë politike, duke shpërfillur faktet e vërtetuara ndërsa thekson gjysmë të vërtetat,” shkruan Rama në letrën drejtuar Tsipras.
Kreu i qeverisë shqiptare argumenton se ngjarja nuk ndodhi gjatë një proteste të zakonshme për të drejtat e pronës, por në një klimë tensionesh të krijuara, sipas tij, nga dezinformimi dhe përpjekjet për të penguar aktivitetin e investitorëve privatë që operojnë mbi prona me dokumentacion të rregullt ligjor.
Rama thekson se autoritetet shqiptare reaguan menjëherë pas incidentit, duke arrestuar punonjësit e sigurisë private të përfshirë, duke revokuar licencën e kompanisë dhe duke shkarkuar drejtorin e Policisë së Vlorës.
“Çdo dëmtim i çdo individi, shqiptar, grek apo jo, është i keqardhur. Rrethanat u sqaruan shpejt, duke çuar në arrestimin e personelit të sigurisë private përgjegjës, revokimin e licencës së operimit të kompanisë së tyre dhe shkarkimin e drejtorit të policisë së Vlorës,” shprehet ai.
Sipas kryeministrit, nuk është e drejtë që një incident i vetëm të përdoret si provë për shkelje të të drejtave të pakicave, të drejtave të pronës apo të sundimit të ligjit në Shqipëri.
“Nuk është as e drejtë dhe as e përgjegjshme të transformosh një incident të izoluar në provë të shkeljes së të drejtave të pakicave, të drejtave të pronës ose të sundimit të ligjit,” thekson Rama.
Në letër, ai nënvizon se angazhimi i Shqipërisë ndaj sundimit të ligjit dhe mbrojtjes së të drejtave të pakicave kombëtare është një detyrim kushtetues dhe europian, ndërsa shton se faktet duhet të vlerësohen nga institucionet dhe gjykatat kompetente, jo nga deklarata politike të ardhura nga vende të tjera.
Kryeministri ndalet edhe te Minoriteti Kombëtar Grek në Shqipëri, të cilin e cilëson një vlerë të rëndësishme për vendin.
“Pakica Kombëtare Greke në Shqipëri është një thesar që e vlerësoj jashtëzakonisht shumë. Ai gëzon të drejta dhe mbrojtje që nuk janë as më shumë e as më pak se ato që gëzojnë të gjithë qytetarët shqiptarë,” shkruan Rama.
Në përfundim të letrës, ai i uron suksese Tsipras në zgjedhjet e ardhshme dhe shpreh shpresën që forca e re politike e ish-kryeministrit grek të shmangë, sipas tij, përdorimin e çështjeve që lidhen me vendet fqinje për përfitime politike të brendshme.
