Të paktën katër persona u vranë kur dy trena u përplasën në qytetin Bekasi, pranë kryeqytetit indonezian Jakarta, vonë të hënën, thanë zyrtarët.
Përplasja ndodhi në stacionin hekurudhor të Bekasit mes një treni të linjës urbane dhe një treni të distancave të gjata, tha zëdhënësja e operatorit të linjës urbane, Karina Amanda, duke shtuar se “po përqendrohemi në evakuimin e pasagjerëve dhe stafit të trenit”.
Katër persona janë konfirmuar të vdekur dhe 38 të tjerë janë dërguar në spitalet pranë, tha Anne Purba, zëdhënëse e operatorit hekurudhor të Indonezisë, duke folur për transmetuesin lokal Kompas TV.
“Duke qenë se evakuimi është ende në vazhdim, është e mundur që numri i viktimave të rritet, por shpresojmë që evakuimi të përfundojë sa më shpejt,” u tha gazetarëve në vendngjarje nënkryetari i parlamentit indonezian, Sufmi Dasco Ahmad.
Ai shtoi se ekipet e shpëtimit po prisnin strukturat e dëmtuara për të nxjerrë të paktën gjashtë ose shtatë persona që ende besohet se janë të bllokuar brenda.
Shkaku i përplasjes nuk është ende i qartë, tha Karina, ndërsa shefi i policisë së Jakartës, Asep Edi Suheri, deklaroi se hetimet janë në vazhdim.
Ekipet e shpëtimit u panë duke përdorur mjete prerëse për të çarë strukturat metalike të vagonëve, ku disa pasagjerë të bllokuar u panë ende gjallë.
Sipas dëshmitarëve të Reuters, të paktën 20 ambulanca ndodheshin në stacionin e Bekasit, ndërsa edhe ekipet e agjencisë kombëtare të shpëtimit të Indonezisë ishin në vend për të ndihmuar në evakuimin e pasagjerëve, shkruan Reuters.
