Një shembje masive gurësh ka ndodhur gjatë orëve të natës në aksin rrugor Pukë–Fushë Arrëz, pranë zonës së njohur si Kroi i Zojës, duke shkaktuar bllokimin e plotë të qarkullimit të automjeteve në këtë segment.
Sipas autoriteteve vendore, shembja u shkaktua nga reshjet e shiut dhe rrëshqitjet e dheut, që kanë sjellë rënien e një sasie të madhe gurësh dhe inertesh në trupin e rrugës.
Në vendngjarje ndodhen ekipet e mirëmbajtjes rrugore, të cilat po punojnë për pastrimin e segmentit dhe rikthimin e qarkullimit sa më shpejt të jetë e mundur.
Deri në përfundimin e punimeve, drejtuesit e mjeteve këshillohen të përdorin rrugë alternative dhe të tregojnë kujdes të shtuar gjatë lëvizjes në zonë, për shkak të rrezikut të vazhdueshëm nga rrëshqitjet.
Autoritetet bëjnë thirrje që udhëtarët të ndjekin njoftimet zyrtare për gjendjen e rrugëve në qarkun e Pukës dhe të shmangin lëvizjet e panevojshme në zonat malore gjatë orëve me reshje.
